काठमाडौं । शारजाहबाट कराँचीतर्फ उडेको पाकिस्तानको कार्गो विमान मंगलबार रातिदेखि सम्पर्कविहीन भएको छ। विमानमा चालक दलका पाँच सदस्य रहेका थिए।
पाकिस्तान विमानस्थल प्राधिकरणका अनुसार उडानका क्रममा नेभिगेसन प्रणालीमा समस्या आएको जानकारी दिएपछि एटीसीले विमानलाई मार्गनिर्देशन गर्ने प्रयास गरेको थियो। तर केही मिनेटमै विमान रडारबाट हराएको र सञ्चार सम्पर्क टुटेको जनाइएको छ।
प्रारम्भिक विवरणअनुसार विमान कराँचीको दक्षिण–पश्चिमतर्फ अरब सागरमा दुर्घटनाग्रस्त भएको आशंका गरिएको छ। विमान हराएपछि समुद्री क्षेत्रमा खोज तथा उद्धार अभियान सञ्चालन भइरहेको छ।
फ्लाइट ट्र्याकिङ तथ्यांकअनुसार विमानको उचाइमा असामान्य परिवर्तन देखिएको थियो। अन्तिम तथ्यांकमा विमान करिब १,१०० फिट उचाइमा रहेको र तीव्र गतिमा तल झरिरहेको देखिएको जनाइएको छ।
सम्पर्कविहीन विमान पाकिस्तानमा दर्ता भएको बोइङ ७३७–४०० कार्गो विमान थियो। २७ वर्ष पुरानो उक्त विमान के–२ एयरवेजले सञ्चालन गर्दै आएको थियो। सन् २०१२ मा यसलाई यात्रुवाहकबाट मालवाहक विमानमा रूपान्तरण गरिएको थियो।
पाकिस्तान विमानस्थल प्राधिकरणले विभिन्न निकायको समन्वयमा विमान र चालक दलका सदस्यहरूको खोजी भइरहेको जनाएको छ। घटनाबारे विमान सञ्चालक कम्पनी र बोइङले भने हालसम्म आधिकारिक प्रतिक्रिया दिएका छैनन्।
