काठमाडौं । लैनचौरस्थित राष्ट्रिय किताबखाना (प्रहरी)ले नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग तथा राष्ट्रिय सतर्कता केन्द्रका प्रहरीतर्फका बहालवाला र अवकाशप्राप्त कर्मचारीलाई आर्थिक वर्ष २०८२/८३ को सम्पत्ति विवरण तोकिएको समयभित्र अनिवार्य रूपमा बुझाउन निर्देशन दिएको छ।
राष्ट्रिय किताबखानाले सार्वजनिक सूचनामार्फत प्रचलित कानुनी व्यवस्थाअनुसार आर्थिक वर्ष समाप्त भएको मितिले ६० दिनभित्र सम्पत्ति विवरण फाराम भरी सम्बन्धित कार्यालयमार्फत किताबखानामा पेश गर्नुपर्ने जनाएको हो। यसअनुसार कर्मचारीहरूले आगामी भदौ २९ गतेभित्र सम्पत्ति विवरण बुझाइसक्नुपर्नेछ।
किताबखानाका अनुसार भ्रष्टाचार निवारण ऐन, २०५९ को दफा ५० को उपदफा (१), अख्तियार दुरुपयोग अनुसन्धान आयोग ऐन, २०४८ को दफा ३१(क) को उपदफा (१) तथा सम्बन्धित सेवा सञ्चालनसम्बन्धी नियमावलीमा भएको व्यवस्थाअनुसार सार्वजनिक पद धारण गरेका कर्मचारीले प्रत्येक आर्थिक वर्षको सम्पत्ति विवरण अनिवार्य रूपमा पेश गर्नुपर्ने कानुनी व्यवस्था रहेको छ।
सम्पत्ति विवरण प्रणालीलाई सार्वजनिक सेवामा पारदर्शिता, जवाफदेहिता र सुशासन प्रवर्द्धन गर्ने महत्वपूर्ण संयन्त्रका रूपमा लिइन्छ। यसमार्फत कर्मचारीको सम्पत्ति तथा आय–व्ययको अभिलेख अद्यावधिक राख्न र सार्वजनिक पदको दुरुपयोग तथा भ्रष्टाचार नियन्त्रणमा सहयोग पुग्ने अपेक्षा गरिएको छ।
राष्ट्रिय किताबखानाले तोकिएको ढाँचाको सम्पत्ति विवरण फाराम सम्बन्धित कार्यालयमार्फत भरी समयमै पेश गर्न सबै सम्बन्धित कर्मचारीलाई आग्रह गरेको छ।
किताबखानाले तोकिएको समयसीमाभित्र सम्पत्ति विवरण नबुझाउने कर्मचारीमाथि भ्रष्टाचार निवारण ऐन, २०५९ को दफा ५० को उपदफा (३) बमोजिम १० हजार रुपैयाँ जरिवाना हुने स्पष्ट पारेको छ। साथै, कानुनबमोजिम आवश्यक अन्य प्रशासनिक प्रक्रिया समेत अघि बढ्न सक्ने भएकाले समयमै विवरण बुझाउन सम्बन्धित कर्मचारीलाई सचेत गराइएको छ।
