काठमाडौं । प्रतिनिधि सभाको बिहीबारको बैठकको शून्य समयमा सांसदहरूले उद्योग, स्वास्थ्य, कृषि, खानेपानी, सडक, वैदेशिक रोजगार, विद्युत् विस्तार तथा विपद् व्यवस्थापनलगायत समसामयिक विषयमा सरकारको ध्यानाकर्षण गराएका छन्।
विभिन्न दलका सांसदहरूले जनजीविकासँग प्रत्यक्ष जोडिएका समस्या समाधानका लागि प्रभावकारी कदम चाल्न सरकारसँग माग गरेका हुन्।
अनुष्का श्रेष्ठले साना तथा मझौला उद्योगले अर्थतन्त्रमा महत्वपूर्ण योगदान पुर्याइरहेको उल्लेख गर्दै यस्ता उद्योगलाई सरकारी सहयोग, तालिम र नीतिगत सहजीकरण आवश्यक रहेको बताइन्। अभिषेकप्रताप शाहले लुम्बिनी प्रदेशको कृष्णनगर भन्सारको स्तरोन्नति गर्न माग गरे।
स्वास्थ्य क्षेत्रतर्फ अम्बिकादेवी सङ्ग्रौलाले नागरिकले मौलिक हकका रूपमा रहेको स्वास्थ्य सेवा प्रभावकारी रूपमा पाए/नपाएको सुनिश्चित गर्न स्वास्थ्य संस्थाको नियमित अनुगमन आवश्यक रहेको बताइन्। अर्जुननरसिंह केसीले राष्ट्रिय मानव अधिकार आयोगको प्रतिवेदन सार्वजनिक गर्न सरकारसँग आग्रह गरे।
कृषि क्षेत्रमा देखिएका समस्याबारे बोल्दै आनन्दबहादुर चन्दले माटो परीक्षण, मल व्यवस्थापन र वैज्ञानिक कृषि ज्ञान विस्तारमा जोड दिए। करिष्मा कठरियाले धान रोपाइँको समयमा किसानलाई समयमै रासायनिक मल उपलब्ध गराउन माग गरिन्।
सांसदहरूले सडक तथा पूर्वाधार निर्माण, खानेपानी र यातायात सेवाका समस्यासमेत उठाएका छन्। आरेन राईले खोटाङ–भोजपुर सडकखण्ड पुनर्निर्माण गर्न माग गरे भने कुलभक्त शाक्यले मेलम्ची खानेपानी आयोजना प्रभावित भएपछि काठमाडौं उपत्यकामा देखिएको खानेपानी समस्या समाधान गर्न आग्रह गरे।
वैदेशिक रोजगारीका क्रममा हुने ठगी नियन्त्रणका लागि प्रभावकारी नियमन आवश्यक रहेको कमल सुवेदीले बताए। त्यस्तै, आशिका तामाङले त्रिभुवन अन्तर्राष्ट्रिय विमानस्थलको पार्किङ शुल्क घटाउन सरकारसँग आग्रह गरिन्।
जङ्गली हात्तीको आक्रमणबाट भइरहेको क्षति नियन्त्रणका लागि प्रभावकारी योजना बनाउन खगेन्द्र कर्णले माग गरे भने खडकबहादुर बुढाले कर्णाली प्रदेशमा विद्युत् पहुँच विस्तार गर्न सरकारको ध्यानाकर्षण गराए।
बैठकमा सांसदहरूले सार्वजनिक स्थानमा धुम्रपान नियन्त्रण, विपद् पूर्वतयारी, सार्वजनिक यातायातलाई अपाङ्गतामैत्री बनाउने तथा राष्ट्रिय सम्पत्तिको संरक्षणलगायत विषयमा समेत सरकारको ध्यान तानेका थिए।
Read More
