काठमाडौं । प्रतिनिधिसभाका सभामुख डोलप्रसाद (डीपी) अर्याल र नेपालका लागि भारतीय राजदूत नवीन श्रीवास्तवबीच शिष्टाचार भेटवार्ता भएको छ।
बिहीबार भएको भेटमा सभामुख अर्यालले नेपाल–भारत सम्बन्ध साझा सभ्यता, भौगोलिक निकटता तथा सामाजिक–सांस्कृतिक सम्बन्धमा आधारित रहेको उल्लेख गरे। उनले व्यापार, सुरक्षा, नागरिक उड्डयन, जलस्रोत र कनेक्टिभिटीलगायत क्षेत्रमा द्विपक्षीय सहकार्य विस्तार हुँदै गएको बताए।
सभामुख अर्यालले हालै सम्पन्न निर्वाचनका क्रममा भारत सरकारले उपलब्ध गराएको लजिस्टिक सहयोगप्रति धन्यवाद व्यक्त गर्दै जनादेशबाट बनेको सरकारले कार्यकालको पहिलो १०० दिन पूरा गरेको जानकारी गराए।
भेटका क्रममा राजदूत श्रीवास्तवले भारतका लोकसभा सभामुख ओम बिरला नेपाल भ्रमणका लागि इच्छुक रहेको जानकारी गराउँदै नेपाली सभामुख तथा सांसदहरूलाई भारतको संसदीय अभ्यास अध्ययन र अवलोकनका लागि निमन्त्रणा दिएका थिए।
राजदूत श्रीवास्तवले संसदीय कूटनीति र उच्चस्तरीय संवादले नेपाल–भारत सम्बन्धलाई थप मजबुत बनाउन सहयोग गर्ने विश्वास व्यक्त गर्दै व्यापार, ऊर्जा, शिक्षा, कनेक्टिभिटी तथा जनस्तरको सम्बन्ध विस्तारमा भारत सहकार्य गर्न प्रतिबद्ध रहेको बताए।
