काठमाडौं । बिहीबार सेयर बजार परिसूचक नेप्सेमा दोहोरो अंकको गिरावट आएको छ। नेप्से परिसूचक १९.६७ अंकले घटेर २६०१.९२ विन्दुमा कायम भएको छ।
नेप्से घटेसँगै कारोबार रकम पनि अघिल्लो दिनको तुलनामा कम भएको छ। बुधबार ४ अर्ब ८२ करोड रुपैयाँ बराबरको कारोबार भएकोमा बिहीबार ४ अर्ब ६१ करोड १९ लाख ५४ हजार ७८२ रुपैयाँ बराबरको सेयर किनबेच भएको छ।
यस दिन ३६१ वटा धितोपत्रको ८७ लाख ५१ हजार ३८० कित्ता सेयर कारोबार भएको छ। कारोबारमा आएका मध्ये ४२ वटा कम्पनीको सेयर मूल्य बढेको छ भने २२९ वटाको घटेको छ। त्यस्तै, ६ वटा कम्पनीको मूल्य स्थिर रहेको छ।
बिहीबार उपकार लघुवित्त वित्तीय संस्थाको सेयर मूल्य सबैभन्दा धेरै १२.६८ प्रतिशतले बढेको छ भने स्नो रिभर्सको सेयर मूल्य ११.७६ प्रतिशतले उकालो लागेको छ।
कारोबार रकमका आधारमा ग्लोबल आइएमई बैंक लिमिटेड डिबेन्चर २०८६/८७ शीर्ष स्थानमा रहेको छ। उक्त धितोपत्रको ३५ करोड रुपैयाँ बराबरको कारोबार भएको छ।
यस दिन अधिकांश समूहगत उपसूचक घटेका छन्। ट्रेडिङ समूहको उपसूचक भने २.३६ प्रतिशतले बढेको छ। डेभलपमेन्ट बैंक, म्युचुअल फण्डलगायत केही समूहमा सामान्य वृद्धि देखिएको छ।
