काठमाडौं । प्रतिनिधिसभाको जेठ १७ गतेको घटनाबारे छानबिन गर्न गठित समितिले सभामुख डोलप्रसाद अर्याललाई संसद्को विशेषाधिकार प्रयोग गर्दै कडा कदम चाल्न सुझाव दिएको छ।
समितिले अमर्यादित तथा उत्तेजक अभिव्यक्ति प्रयोग भएमा प्रतिनिधिसभा नियमावलीअनुसार त्यस्ता शब्द अभिलेखबाट हटाउनेदेखि सम्बन्धित सदस्यलाई बैठकबाट निष्कासन गर्नेसम्मका व्यवस्था प्रभावकारी रूपमा कार्यान्वयन गर्न सिफारिस गरेको हो।
संसद्को गरिमा र अनुशासन कायम राख्न सांसदहरूका लागि अभिमुखीकरण तथा आचारसंहितासम्बन्धी सचेतना बढाउन, दलीय नेतृत्व र प्रमुख सचेतकहरूको भूमिकालाई प्रभावकारी बनाउन तथा सुरक्षा र प्रविधि व्यवस्थापन सुधार गर्न समितिले सुझाव दिएको छ।
जेठ १७ गते प्रतिनिधिसभा नियमावली पारित गर्ने क्रममा सदनमा धकेलाधकेल भएपछि जेठ १८ गते सभामुखले प्रतिनिधिसभाका सचिव प्रकाश अधिकारीको संयोजकत्वमा छानबिन समिति गठन गरेका थिए। समितिमा आन्तरिक स्रोत तथा योजना व्यवस्थापन महाशाखा प्रमुख बबिता मिश्र र प्रविधि व्यवस्थापन महाशाखा प्रमुख गोपाल सिग्देल सदस्य रहेका थिए।
समितिले स्थलगत मुचुल्का, श्रव्यदृश्य प्रमाण, प्रत्यक्षदर्शीको बयान तथा सम्बन्धित दस्तावेजको अध्ययन गरी प्रतिवेदन तयार पारेको हो। सात दिनको समय पाएको समितिले जेठ २५ गते प्रारम्भिक प्रतिवेदन सभामुख अर्याललाई बुझाएको थियो।
