काठमाडौं । प्रधानमन्त्री वालेन्द्र शाहले निर्माण क्षेत्रका समस्या समाधान, भौतिक पूर्वाधार विकास, लगानी वातावरण सुधार तथा आर्थिक सुधारका विषयमा नेपाल निर्माण व्यवसायी महासंघका पदाधिकारीसँग छलफल गरेका छन्।

बिहीबार प्रधानमन्त्री तथा मन्त्रिपरिषद्को कार्यालयमा भएको छलफलमा प्रधानमन्त्री शाहले निर्माण क्षेत्र मुलुकको आर्थिक विकास, रोजगारी सिर्जना र पूर्वाधार निर्माणको महत्वपूर्ण आधार भएकाले यस क्षेत्रका समस्या समाधान गर्न सरकार सकारात्मक रहेको बताए।

उनले निर्माण व्यवसायलाई मर्यादित, पारदर्शी, जिम्मेवार र परिणाममुखी बनाउँदै विकास निर्माणका काम निर्धारित समयमै सम्पन्न गर्न सरकार, निजी क्षेत्रलगायत सबै पक्षबीच सक्रिय सहकार्य आवश्यक रहेकोमा जोड दिए।

छलफलमा नेपाल निर्माण व्यवसायी महासंघका अध्यक्ष निकोलश पाण्डे, वरिष्ठ उपाध्यक्ष मुकेश पन्त, महासचिव शिवहरि घिमिरे, बागमती प्रदेश उपाध्यक्ष बालकृष्ण थापा तथा महासंघका पूर्वअध्यक्ष एवं सल्लाहकार जयराम लामिछाने सहभागी थिए।

महासंघका पदाधिकारीहरूले निर्माण क्षेत्रले भोगिरहेका भुक्तानी, म्याद थप, ठेक्का व्यवस्थापन, आयोजना कार्यान्वयन, मूल्य समायोजन, बैंकिङ तथा लगानीसम्बन्धी समस्याबारे प्रधानमन्त्रीलाई जानकारी गराएका थिए।

उनीहरूले निर्माण उद्योगलाई चलायमान बनाउन सरकार र निजी क्षेत्रबीचको सहकार्यलाई थप प्रभावकारी बनाउनुपर्ने आवश्यकता औंल्याएका थिए।

छलफलमा प्रधानमन्त्री तथा मन्त्रिपरिषद्को कार्यालयका प्रमुख सल्लाहकार कुमार व्यञ्जनकार, सूचना तथा सञ्चार प्रविधि सल्लाहकार विवेक मिश्र तथा प्रमुख स्वकीय सचिव सुवास शर्मा पनि सहभागी थिए।

Read More

काठमाडौं । कृषि, वन तथा पर्यावरणमन्त्री गीता चौधरीले कृषि क्षेत्रलाई मुलुकको मुख्य आर्थिक आधारका रूपमा विकास गर्न सरकार प्रतिबद्ध रहेको बताएकी छन्।

मन्त्रालय सम्हालेको १०० दिन पूरा भएको अवसरमा बिहीबार आयोजित पत्रकार सम्मेलनमा उनले किसानका समस्या समाधान र कृषि क्षेत्रको आधुनिकीकरणका लागि सरकारले गरेका प्रयासबारे जानकारी दिएकी हुन्।

मन्त्री चौधरीले सबै पक्षको सहकार्य र अर्थ मन्त्रालयको सहयोगमा समयमै रासायनिक मल भित्र्याउन सफल भएको उल्लेख गरिन्। उनले बजेट निर्माणका क्रममा कृषि क्षेत्र सरकारको प्राथमिकतामा रहेको स्पष्ट पार्दै किसानको हित र मानव–वन्यजन्तु द्वन्द्व व्यवस्थापनका लागि आवश्यक स्रोत सुनिश्चित हुने बताइन्।

कृषि क्षेत्रमा रहेको बिचौलिया प्रणाली अन्त्य गर्न कृषि विधेयकमार्फत नीतिगत सुधार गरिएको जानकारी दिँदै उनले किसानको हितलाई केन्द्रमा राखेर काम भइरहेको बताइन्।

त्यस्तै, दुग्ध उत्पादक किसानको बक्यौता भुक्तानीका विषयमा सरकार गम्भीर रहेको र हाल दैनिक करिब १ करोड रुपैयाँका दरले भुक्तानी भइरहेको मन्त्री चौधरीले जानकारी दिइन्।

Read More

काठमाडौं । त्रिपुरेश्वरस्थित राहदानी विभाग अगाडि एक व्यक्तिले आत्मदाह प्रयास गरेका छन्।

विभागको ३ नम्बर गेटअगाडि एक पुरुषले केहीबेरअघि शरीरमा आगो लगाएर आत्मदाह प्रयास गरेका हुन्।

प्रहरीले उनलाई नियन्त्रणमा लिएर उपचारका लागि अस्पताल लगेको काठमाडौंका प्रहरी प्रवक्ता एसपी पवनकुमार भट्टराईले जानकारी दिए।

ती पुरुषको पहिचान र आत्मदाह प्रयास गर्नुको कारण भने खुल्न बाँकी रहेको छ।

Read More

काठमाडौँ । काठमाडौँको जडीबुटी क्षेत्रबाट यात्रुलाई हैरानी गरेको आरोपमा ३२ जना बिचौलिया पक्राउ परेका छन्। सार्वजनिक यातायातमार्फत उपत्यकाबाट पूर्वतर्फ जान लागेका यात्रुलाई जबर्जस्ती तानातान गर्ने, सवारीमा सिट मिलाइदिने भन्दै दबाब दिने तथा असहज अवस्था सिर्जना गरेको आरोपमा उनीहरूलाई नियन्त्रणमा लिइएको हो।

जडीबुटी क्षेत्रमा रामेछाप, दोलखा र सिन्धुपाल्चोक जाने बसहरू सञ्चालन हुने बसपार्क रहेको छ। यसै स्थानबाट तराई तथा पूर्वी क्षेत्रतर्फ जाने अन्य साना सवारी साधनसमेत छुट्ने गरेका छन्।

प्रहरीका अनुसार केही बिचौलियाले यात्रुको झोला तान्ने, सवारीमा चढाउनका लागि दबाब दिने तथा महिलालगायत यात्रुमाथि अनुचित व्यवहार गर्ने गरेको गुनासो प्राप्त भएको थियो। यात्रुलाई दुःख दिने यस्ता गतिविधि रोक्न प्रहरीले निगरानी बढाउँदै आएको जनाएको छ।

उपत्यका अपराध अनुसन्धान कार्यालयका अनुसार पक्राउ परेका व्यक्तिमाथि आवश्यक अनुसन्धान भइरहेको छ। यसअघि प्रहरीले काठमाडौँको बल्खु क्षेत्रबाट पनि १७ जना बिचौलियालाई पक्राउ गरेको थियो।

प्रहरीले सार्वजनिक यातायात क्षेत्रमा यात्रुको सुरक्षा र सहज यात्राका लागि यस्ता गतिविधिमा संलग्न व्यक्तिमाथि निरन्तर कारबाही गरिने जनाएको छ।

Read More

काठमाडौं। चीनको दक्षिणी क्षेत्रमा आएको मेसाक आँधीका कारण उत्पन्न भीषण बाढीमा परी मृत्यु हुनेको सङ्ख्या ३९ पुगेको छ। चिनियाँ अधिकारीहरूले बाढीका कारण हालसम्म ३९ जनाको मृत्यु भएको पुष्टि गरेका छन्।

यसैबीच, ताइवान र चीनको पूर्वी तटीय क्षेत्रका बासिन्दा अर्को शक्तिशाली आँधी बाभीको सामना गर्न तयारी अवस्थामा रहेका छन्।

चिनियाँ अधिकारीहरूका अनुसार नान्निङ सहरको पूर्वी क्षेत्रमा रहेको बाँध भत्किँदा मात्रै २६ जनाको मृत्यु भएको छ। नान्निङका उपमेयर डिङ वेईले पत्रकार सम्मेलनमार्फत उक्त जानकारी दिएका हुन्। ग्वाङ्सी क्षेत्रमा अझै ९ जना बेपत्ता रहेको बताइएको छ।

मेसाक आँधीका कारण गत शनिबारदेखि ग्वाङ्सी क्षेत्रमा असाधारण वर्षा भएको थियो। अत्यधिक वर्षापछि जलाशय फुट्नुका साथै बस्तीहरू डुबानमा परेका थिए। हजारौँ मानिस केही दिनसम्म घर तथा अन्य भवनमा फसेका थिए। यसअघि बाढीमा ६ जनाको मृत्यु भएको प्रारम्भिक जानकारी दिइएको थियो।

चीनको राष्ट्रिय मौसम विज्ञान केन्द्रका अनुसार ग्वाङ्सीका केही क्षेत्रमा १० देखि ४० सेन्टिमिटरसम्म वर्षा भएको छ भने सबैभन्दा प्रभावित क्षेत्रमा ९० सेन्टिमिटरभन्दा बढी वर्षा मापन गरिएको छ।

बाँध र जलाशय फुटेपछि आएको बाढीले धेरै सहर तथा बस्ती प्रभावित भएका छन्। उद्धारका लागि ड्रोनसहित करिब ५ हजार ७०० डुङ्गा परिचालन गरिएको छ। तीव्र पानीको बहाव र बाढीले ल्याएको फोहोरका कारण उद्धारकर्मीहरूले प्रभावित नागरिकसम्म पुग्न कठिनाइ भोगिरहेका छन्।

अहिलेसम्म करिब १ लाख ३० हजार मानिसलाई सुरक्षित स्थानमा सारिएको छ। अधिकारीहरूका अनुसार बाढीको पानी घट्न थाले पनि आगामी दुई दिन केही क्षेत्रमा थप वर्षाको सम्भावना रहेको छ।

सबैभन्दा प्रभावित हेङ्झोउ सहरलगायत क्षेत्रमा हिलो र फोहोर हटाउने तथा सङ्क्रमण नियन्त्रणका लागि कीटाणुनाशक छर्किने काम भइरहेको छ। उपमेयर डिङ वेईका अनुसार सडक मर्मत जारी छ भने ६० हजारभन्दा बढी घरमा विद्युत् सेवा पुनः सञ्चालन गरिएको छ।

Read More

ललितपुर । ललितपुर महानगरपालिकाले आगामी साउन १५ गतेदेखि बालबालिका, अशक्त व्यक्ति तथा ज्येष्ठ नागरिकलाई लक्षित गर्दै घरमै स्वास्थ्य सेवा उपलब्ध गराउने भएको छ। महानगरले स्वास्थ्यकर्मीको टोली परिचालन गरी आवश्यक परेका नागरिकलाई घरमै पुगेर उपचार सेवा दिने जनाएको छ।

नगरप्रमुख चिरीबाबु महर्जनले स्वास्थ्य समस्या देखिएमा महानगरको हटलाइन नम्बर ११३१ मा सम्पर्क गर्न नगरवासीलाई आग्रह गरेका छन्।

महानगरका अनुसार हटलाइनमार्फत बिरामीको जानकारी प्राप्त भएपछि एम्बुलेन्ससहित चिकित्सक, नर्स र आवश्यक औषधि बोकेको स्वास्थ्य टोली बिरामीको घरमै पुग्नेछ। स्वास्थ्यकर्मीले बिरामीको अवस्था मूल्यांकन गरी आवश्यक उपचार गर्नेछन्।

घरमै उपचार सम्भव नभएका बिरामीलाई थप उपचारका लागि सोही एम्बुलेन्समार्फत अस्पताल पठाउने व्यवस्था समेत गरिएको महानगरले जनाएको छ।

Read More

काठमाडौं । नक्सालस्थित नेपाल बाल सङ्गठनको रकम हिनामिना गरेको आरोपमा प्रहरीले तीन जनालाई पक्राउ गरेको छ।

केन्द्रीय अनुसन्धान ब्युरो (सीआईबी) को स्रोतका अनुसार घटनाबारे अनुसन्धानका लागि तीन जनालाई नियन्त्रणमा लिइएको हो। पक्राउ परेकाहरूमाथि सङ्गठनको आर्थिक कारोबारमा अनियमितता गरेको आरोपमा अनुसन्धान भइरहेको जनाइएको छ।

पक्राउ पर्नेमा ५१ वर्षीय राजेन्द्रकुमार श्रेष्ठ, ६२ वर्षीय ओमकृष्ण श्रेष्ठ र ५४ वर्षीया आशा श्रेष्ठ रहेका छन्।

प्रहरीले घटनाको थप अनुसन्धान अघि बढाइरहेको जनाएको छ। अनुसन्धानका क्रममा आर्थिक कारोबार, जिम्मेवारी र संलग्नतासम्बन्धी थप विवरण खुल्ने प्रहरीले जनाएको छ।

Read More

काठमाडौं । नेपाली बजारमा सुन र चाँदीको मूल्य घटेको छ। नेपाल सुनचाँदी व्यवसायी महासंघका अनुसार आज छापावाल सुनको मूल्य प्रतितोला २ लाख ८४ हजार ७०० रुपैयाँ कायम भएको छ।

बुधबार प्रतितोला २ लाख ८७ हजार १०० रुपैयाँमा कारोबार भएको सुनको मूल्य आज २ हजार ४०० रुपैयाँले घटेको हो। महासंघका अनुसार आज सुनको मूल्य प्रतिदश ग्राम २ लाख ४४ हजार ८५ रुपैयाँ निर्धारण गरिएको छ।

यस्तै, चाँदीको मूल्य पनि घटेको छ। महासंघका अनुसार आज चाँदी प्रतितोला ४ हजार ३४० रुपैयाँ कायम भएको छ। बुधबार प्रतितोला ४ हजार ५०० रुपैयाँ रहेको चाँदीको मूल्य आज १६० रुपैयाँले घटेको हो।

आज चाँदीको मूल्य प्रतिदश ग्राम ३ हजार ७२० रुपैयाँ ५० पैसा कायम भएको महासंघले जनाएको छ।

Read More

काठमाडौं । सरकारले निजामती कर्मचारीको आचरण, अनुशासन र सेवा प्रवाहलाई थप प्रभावकारी बनाउन ‘कर्मचारीले पालना गर्नुपर्ने आचारसंहिता, २०८३’ लागू गरेको छ। नयाँ आचारसंहिताले कर्मचारीको सामाजिक सञ्जाल प्रयोग, सेवाग्राहीसँगको व्यवहार, सार्वजनिक अभिव्यक्ति तथा पदको प्रयोगसम्बन्धी विभिन्न विषयमा स्पष्ट मापदण्ड निर्धारण गरेको छ।

भूमि व्यवस्था, सहकारी तथा गरिबी निवारण मन्त्रालय, संघीय मामिला तथा सामान्य प्रशासन मन्त्रालयका अनुसार मन्त्री प्रतिभा रावलको असार १६ गतेको मन्त्रीस्तरीय निर्णयबाट आचारसंहिता स्वीकृत गरिएको हो। असार २२ गतेदेखि कार्यान्वयनका लागि यसलाई सबै महाशाखा, विभाग तथा मातहतका निकायमा पठाइसकिएको मन्त्रालयले जनाएको छ।

आचारसंहिताअनुसार कर्मचारीले कार्यालय समयमा कार्यालय परिसर वा फिल्डमा सरकारी जिम्मेवारीमा खटिएको अवस्थामा कार्यालयको पोसाकमा खिचिएका फोटो वा भिडियो सामाजिक सञ्जालमा प्रकाशन वा साझेदारी गर्न पाउने छैनन्। यद्यपि शिक्षामूलक, जनचेतनामूलक वा सूचनामूलक सामग्रीका हकमा भने यो व्यवस्था लागू नहुने उल्लेख गरिएको छ।

त्यस्तै, फेसबुक, एक्स (पूर्वट्विटर), ह्वाट्सएप, टिकटकलगायत सामाजिक सञ्जाल प्रयोग गर्दा सार्वजनिक सेवाको मर्यादा, निष्पक्षता र संस्थाप्रतिको विश्वासमा असर नपर्ने गरी व्यावसायिक सतर्कता अपनाउनुपर्ने व्यवस्था गरिएको छ। कर्मचारीले सरकारको नीति, कार्यक्रम तथा आधिकारिक निर्णयको प्रतिकूल हुने गरी लेख, विचार वा टिप्पणी सार्वजनिक गर्न नपाउने व्यवस्था पनि आचारसंहितामा समावेश गरिएको छ।

आचारसंहिताले सेवाग्राहीसँगको सम्बन्धलाई पनि थप व्यवस्थित बनाएको छ। कार्यालयबाहिर सेवाग्राहीसँग अनावश्यक भेटघाट गर्न नपाइने, कुनै पनि सेवाग्राहीको प्रतिनिधि वा एजेन्टका रूपमा काम गर्न नहुने तथा आफ्नो पद वा जिम्मेवारीको दुरुपयोग गरी व्यक्तिगत वा पारिवारिक लाभ लिन नपाइने स्पष्ट व्यवस्था गरिएको छ।

मन्त्रालयका अनुसार आचारसंहिताको उद्देश्य कर्मचारीको आचरणलाई निष्पक्ष, सदाचारयुक्त, अनुशासित र मर्यादित बनाउँदै सार्वजनिक सेवा प्रवाहमा पारदर्शिता, जवाफदेहिता र प्रभावकारिता अभिवृद्धि गर्नु हो। सरकारले सबै सरकारी निकायलाई आचारसंहिताको पूर्ण कार्यान्वयन सुनिश्चित गर्न निर्देशन दिएको छ।

Read More