काठमाडौं । इलामको माई नगरपालिका र माङसेबुङ गाउँपालिका जोड्ने आत्मानन्द मार्गअन्तर्गत रिखुवा खोलामा निर्माण गरिएको पक्की पुल सञ्चालनमा आएको छ। माई नगरपालिका–६ स्थित उक्त पुल निर्माण सम्पन्न भएपछि वर्षायाममा हुने आवतजावतको समस्या हट्ने भएको छ।
संघीय सरकारअन्तर्गत पुल सेक्टर धरानको लगानीमा निर्माण भएको पुल ३० करोड ६४ लाख ८४ हजार रुपैयाँ लागतमा सम्पन्न भएको हो। आयोजना प्रमुख इन्जिनियर आशिष थापा मगरका अनुसार ३३ करोड ९८ लाख २२ हजार ५८९ रुपैयाँमा ठेक्का आह्वान गरिएकोमा निर्माण कम्पनीले ३० करोड ६४ लाख ८४ हजार रुपैयाँमा सम्झौता गरी काम पूरा गरेको हो।
शान्ति निर्माण सेवासँग २०७९ पुस ३० गते भएको सम्झौताअनुसार २०८३ असार ३० गतेभित्र निर्माण सम्पन्न गर्नुपर्ने थियो। तर निर्माण कम्पनीले तोकिएको समयभन्दा अगावै काम सकेको आयोजना प्रमुख मगरले जानकारी दिए।
पुल सेक्टरका इन्जिनियर हरि मण्डलका अनुसार नवनिर्मित पुल २०० मिटर लामो र ११ मिटर चौडा रहेको छ। पुल सञ्चालनमा आएपछि स्थानीयको यात्रा सुरक्षित र सहज भएको छ।
यसअघि रिखुवा खोलामा पुल नहुँदा वर्षाको समयमा बाढी आएपछि दुई क्षेत्रबीचको आवतजावत रोकिने गरेको थियो। बिरामीलाई अस्पताल लैजान, विद्यार्थीलाई विद्यालय जान र दैनिक कामका लागि यात्रा गर्न स्थानीयले कठिनाइ भोग्दै आएका थिए।
माई नगरपालिका–६ का स्थानीय बुधराज योङहाङले पुल निर्माणपछि वर्षौंदेखिको समस्या समाधान भएको बताए। उनका अनुसार यसअघि पानी पर्नेबित्तिकै खोला वारपार गर्न समस्या हुने गरेको थियो।
पुल निर्माण भएपछि माङसेबुङ गाउँपालिकाका बासिन्दालाई झापाको विर्तामोड, माई नगरपालिका र धार्मिकस्थल लारुम्बासम्म पुग्न सहज भएको माई नगरपालिकाका प्रमुख खम्बासिंह लिम्बूले बताए।
स्थानीय पूर्वाधार विस्तारसँगै यस क्षेत्रको धार्मिक पर्यटन, व्यापारिक गतिविधि र जनजीवनमा सकारात्मक प्रभाव पर्ने अपेक्षा गरिएको छ।
