काठमाडौं। लामो समयदेखि स्वीकृति नलिई कार्यालयमा अनुपस्थित रहेका स्वास्थ्य सेवाका २३ जना कर्मचारीमाथि स्वास्थ्य तथा खाद्य स्वच्छता मन्त्रालयले कारबाही प्रक्रिया अघि बढाएको छ।
मन्त्रालयले सार्वजनिक सूचना जारी गर्दै डाक्टर, नर्स र ल्याब टेक्निसियनसहितका कर्मचारीलाई १५ दिनभित्र स्पष्टीकरण पेस गर्न निर्देशन दिएको हो। तोकिएको अवधिभित्र चित्तबुझ्दो जवाफ नदिए नियमअनुसार थप कारबाही गरिने मन्त्रालयले जनाएको छ।
नेपाल स्वास्थ्य सेवा ऐन, २०५३ को दफा ७४ को उपदफा (१) खण्ड (ज) अनुसार बिदा स्वीकृत नगराई लगातार ६० दिनभन्दा बढी समय कार्यालयमा अनुपस्थित रहेको पाइएपछि मन्त्रालयले स्पष्टीकरण माग गरेको हो।
मन्त्रालयका अनुसार कर्मचारीको नियमित उपस्थिति र सेवा प्रवाहलाई प्रभावकारी बनाउन कानुनी प्रक्रिया अघि बढाइएको हो। स्वास्थ्यजस्तो संवेदनशील क्षेत्रमा कार्यरत कर्मचारी लामो समयसम्म अनुपस्थित हुँदा सेवा प्रवाहमा असर पर्न सक्ने भएकाले मन्त्रालयले निगरानी बढाएको जनाएको छ।
