काठमाडौं। अमेरिका र इरानबीचको द्वन्द्व थप चर्किएको छ। बुधबार साँझ अमेरिकी सेनाले इरानका केही महत्वपूर्ण सैन्य संरचनामाथि हवाई हमला गरेको जनाएको छ। आक्रमणपछि अमेरिकी राष्ट्रपति डोनाल्ड ट्रम्पले इरानी नेतृत्वलाई आफ्नो व्यवहार सुधार्न चेतावनी दिएका छन्।
अमेरिकी सेन्ट्रल कमान्ड (सेन्टकम) का अनुसार पछिल्लो कारबाहीमा इरानका सैन्य कमान्ड केन्द्र, हवाई सुरक्षा प्रणाली, क्षेप्यास्त्र तथा ड्रोनसम्बन्धी पूर्वाधार र तटीय निगरानी संयन्त्रलाई लक्ष्य बनाइएको थियो। अमेरिकी पक्षले हालका लागि उक्त सैन्य अभियान पूरा भएको जानकारी दिएको छ।
अमेरिकाले यो कारबाहीको उद्देश्य हर्मुज जलडमरूमध्य हुँदै सञ्चालन हुने अन्तर्राष्ट्रिय व्यापारिक जहाज र तिनमा रहेका चालक दललाई जोखिम पुर्याउन सक्ने इरानी क्षमतामा नियन्त्रण गर्नु रहेको बताएको छ।
इरानी आक्रमणको दाबीपछि अमेरिकी प्रतिक्रिया, वार्तामाथि अन्योल
इरानले बहराइन र कुवेतस्थित अमेरिकी सैन्य आधारहरूमा आक्रमण गरेको दाबी गरेपछि वासिङ्टनले पछिल्लो सैन्य कदम चालेको हो। अर्कोतर्फ, इरानका प्रमुख वार्ताकार तथा संसदका सभामुख मोहम्मद बगेर गालिबाफले सरकारी सञ्चारमाध्यममार्फत कुनै सम्झौताबाट देशलाई लाभ नहुने अवस्था आए त्यसलाई निरन्तर स्वीकार गरिरहनुपर्ने कारण नरहेको बताएका छन्।
यसअघि अमेरिकी राष्ट्रपति ट्रम्पले इरानलाई वार्तामा फर्कन दबाब दिँदै चेतावनी दिएका थिए। उनले इरानले आगामी सातासम्म वार्ताको बाटो नसमाते पुल तथा ऊर्जा पूर्वाधारजस्ता क्षेत्रमा समेत कारबाही हुन सक्ने बताएका थिए।
