काठमाडौं । कोशी प्रदेश सरकारको मन्त्रिपरिषद् बैठकले तीन वटा महत्त्वपूर्ण निर्णय गरेको छ। बैठकले ग्रामीण सडक सञ्जाल सुधार आयोजना, सार्वजनिक खरिद र ‘म अघि बढ्छु’ कार्यक्रमसँग सम्बन्धित विभिन्न कानुनी तथा कार्यविधिगत प्रस्ताव स्वीकृत गरेको हो।
सरकारका प्रवक्ता तथा आन्तरिक मामिला तथा कानुनमन्त्री इन्द्रमणि पराजुलीका अनुसार आर्थिक, सामाजिक तथा पूर्वाधार समितिबाट परिमार्जित ग्रामीण सडक सञ्जाल सुधार आयोजनाअन्तर्गत अतिरिक्त लगानीका कारण प्रभावित संरचना, घरटहरा तथा भौतिक सम्पत्तिको क्षतिपूर्ति निर्धारण र वितरणसम्बन्धी निर्देशिका, २०८३ स्वीकृत गर्ने निर्णय भएको छ।
त्यस्तै, मन्त्रिपरिषद् बैठकले सार्वजनिक खरिद नियमावली, २०८३ पनि पारित गरेको छ। बैठकले कानुन, न्याय तथा प्रदेश मामिला समितिबाट परिमार्जित ‘म अघि बढ्छु’ कार्यक्रम कार्यान्वयन कार्यविधि, २०८३ लाई समेत स्वीकृति दिएको छ।
प्रदेश सरकारले यी निर्णयले विकास आयोजना सञ्चालन, सार्वजनिक खरिद प्रक्रिया तथा लक्षित कार्यक्रम कार्यान्वयनलाई थप व्यवस्थित बनाउने अपेक्षा गरेको जनाएको छ।
