काठमाडौं । बागमती प्रदेश सरकारमा सहभागी नेकपा (एमाले) का ६ जना मन्त्रीले आज राजीनामा बुझाउने भएका छन्। एमालेका मन्त्रीहरूले मंगलबार बिहान मुख्यमन्त्री इन्द्रबहादुर बानियाँलाई भेटेर राजीनामा बुझाउने र प्रदेश सरकारलाई दिएको समर्थनसमेत फिर्ता लिने तयारी गरेका हुन्।
यसअघि गत असार ३२ गते मन्त्रिपरिषद् बैठकपछि काठमाडौं फर्किएका एमालेका मन्त्रीहरू पाँच दिनपछि मंगलबार राति हेटौँडा फर्किएका थिए। पार्टी नेतृत्वको निर्देशनपछि उनीहरूले तत्काल राजीनामा दिएका थिएनन्। यसअघि असार ३२ गते र साउन २ गते गरी दुई पटकसम्म मन्त्रीहरूलाई राजीनामा दिन भनिए पनि नेतृत्वको निर्णयपछि प्रक्रिया रोकिएको थियो।
नेकपा (एमाले) का अध्यक्ष केपी शर्मा ओली र नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ बीच साउन ५ गते प्रदेश सरकारमा सत्ता सहकार्यका विषयमा छलफल भएपछि एमालेले बागमती सरकारबाट बाहिरिने निर्णय गरेको हो।
बागमती प्रदेश सरकारमा एमालेको तर्फबाट कृषि, पशुपन्छी, वन तथा वातावरण मन्त्रालय सम्हालिरहेका मन्त्री पौडेल, भौतिक पूर्वाधार विकासमन्त्री डा. दिनेशचन्द्र देवकोटा, उद्योग, पर्यटन, श्रम तथा यातायात मन्त्रालयमा यातायात क्षेत्रको जिम्मेवारी पाएका मन्त्री जयराम थापा, कृषि मन्त्रालयअन्तर्गत वन तथा वातावरण विषय हेर्ने मन्त्री भरतबहादुर केसी, स्वास्थ्य तथा सामाजिक विकास मन्त्रालयअन्तर्गत स्वास्थ्य विषय हेर्ने मन्त्री किरण थापा र उद्योग, पर्यटन, श्रम तथा यातायातमन्त्री बिन्दु श्रेष्ठ सरकारमा सहभागी छन्।
