काठमाडौं। आकर्षक तलब र रोजगारीको आश्वासन दिँदै विदेश पठाइदिने भन्दै विभिन्न व्यक्तिबाट ३२ लाख ३८ हजार रुपैयाँ ठगी गरेको आरोपमा प्रहरीले चार जनालाई पक्राउ गरेको छ।
केन्द्रीय प्रहरी समाचारकक्षका अनुसार पक्राउ पर्नेमा काठमाडौं महानगरपालिका–१७ की ३२ वर्षीया पूजा शाही, सप्तरीको बोदेबरसाइन नगरपालिका–३ का २० वर्षीय दीपक साह, सर्लाहीको बसबरिया गाउँपालिका–३ का ४१ वर्षीय जयमङ्गलप्रसाद निसाद र रामेछापको मन्थली नगरपालिका–३ की ३७ वर्षीया मिना श्रेष्ठ रहेका छन्।
प्रहरीको अनुसन्धानअनुसार पूजा शाहीले बेलायत पठाइदिने आश्वासन दिँदै एक व्यक्तिबाट १७ लाख रुपैयाँ लिएकी थिइन्। त्यसैगरी दीपक साहले फ्रान्स पठाइदिने भन्दै पाँच लाख रुपैयाँ, जयमङ्गलप्रसाद निसादले ब्रुनाईमा रोजगारी दिलाइदिने भन्दै चार लाख ३८ हजार रुपैयाँ तथा मिना श्रेष्ठले संयुक्त अरब इमिरेट्स (यूएई) पठाइदिने भन्दै छ लाख रुपैयाँ ठगी गरेको आरोप छ।
प्रहरीले चारै जनालाई मंगलबार पक्राउ गरी वैदेशिक रोजगारीसँग सम्बन्धित ठगीको कसुरमा थप अनुसन्धान अघि बढाएको जनाएको छ। साथै, वैदेशिक रोजगारीका लागि जाने तयारीमा रहेका व्यक्तिलाई आधिकारिक प्रक्रिया र इजाजतप्राप्त म्यानपावर कम्पनीमार्फत मात्रै प्रक्रिया अघि बढाउन पनि आग्रह गरेको छ।
