काठमाडौं । विरोध प्रदर्शनका क्रममा पक्राउ परेका भारतीय विपक्षी नेता राहुल गान्धीलाई केही समयपछि रिहा गरिएको छ।
शिक्षा प्रणालीमा सुधार र शिक्षा मन्त्री धर्मेन्द्र प्रधानको राजीनामाको माग गर्दै राजधानी नयाँदिल्लीमा भएको प्रदर्शनको नेतृत्व गान्धीले गरेका थिए। उनले सरकारले विद्यार्थीको आवाज दबाउन प्रहरी परिचालन गरेको आरोप लगाएका छन्।
प्रदर्शन हिंसात्मक बनेपछि प्रहरीले अश्रुग्यास र लाठीचार्ज गरेको जनाएको छ। घटनामा ६० सर्वसाधारण र ११८ प्रहरी घाइते भएका छन्।
सरकारमाथि परीक्षा व्यवस्थापनमा गम्भीर कमजोरी भएको आरोप लागिरहेका बेला शिक्षा मन्त्री प्रधानले सुधार र पारदर्शिताप्रति सरकार प्रतिबद्ध रहेको बताएका छन्।
यस आन्दोलनलाई मुम्बई र बेङ्गलुरुसहित अन्य सहरमा पनि समर्थन मिलेको छ। मेडिकल प्रवेश परीक्षासम्बन्धी विवादपछि सुरु भएको विरोध अभियानले भारतको परीक्षा प्रणालीमाथि थप प्रश्न उठाएको छ।
