काठमाडौं। सुनसरीको देवानगञ्जमा प्रहरी र स्थानीयबीच भएको हिंसात्मक झडपमा एक जनाको मृत्यु र २४ जना घाइते भएपछि गृह मन्त्रालयले गठन गरेको उच्चस्तरीय छानबिन टोलीले अनुसन्धान सुरु गरेको छ।
गृह मन्त्रालयका सहसचिव भूपेन्द्र थापाको संयोजकत्वमा गठित पाँच सदस्यीय समितिले मंगलबारदेखि आफ्नो काम थालेको हो। टोलीले घटनाको वास्तविक कारण, घटनाक्रम, सुरक्षा निकायको भूमिका र त्यसपछिको अवस्थाबारे अध्ययन गरिरहेको छ।
छानबिन टोलीले घटनास्थलको निरीक्षण गर्नुका साथै प्रत्यक्षदर्शी, स्थानीयवासी र घाइतेहरूसँग जानकारी लिन थालेको छ। टोलीले विराटनगरस्थित विभिन्न अस्पतालमा पुगेर उपचाररत घाइतेहरूको अवस्थाबारे समेत जानकारी लिएको छ।
समितिले घटनाको तथ्य र प्रमाणका आधारमा निष्कर्ष निकालेर दोषीमाथि कारबाहीका लागि सिफारिस गर्ने तथा भविष्यमा यस्ता घटना दोहोरिन नदिन आवश्यक उपायसहितको प्रतिवेदन गृह मन्त्रालयमा बुझाउने जनाइएको छ।
यसैबीच, छानबिन प्रक्रिया अघि बढे पनि देवानगञ्ज क्षेत्रमा तनाव पूर्ण रूपमा नियन्त्रणमा आउन सकेको छैन। घटनाको विरोधमा उत्रिएको समूहले प्रदर्शनका क्रममा केही स्थानमा तोडफोड, लुटपाट र आगजनी गरेको प्रहरीले जनाएको छ।
स्थिति नियन्त्रणमा लिन ठूलो संख्यामा सुरक्षाकर्मी परिचालन गरिएको छ। प्रदर्शनकारीहरूले पूर्व–पश्चिम राजमार्गसमेत अवरुद्ध पारेपछि प्रशासनले सर्वसाधारणलाई संयम अपनाउन आग्रह गरेको छ।
स्थानीय प्रशासनले शान्ति–सुरक्षा कायम गर्न सुरक्षा निकायलाई उच्च सतर्क अवस्थामा राखिएको जनाएको छ।
