काठमाडौं। सुनसरीको देवानगञ्ज गाउँपालिका–३ स्थित कप्तानगञ्जमा भएको घटनापछि सुरक्षा नेतृत्वमा व्यापक हेरफेर गरिए पनि जिल्लाको अवस्था सामान्य बन्न सकेको छैन। प्रदर्शन चर्किँदै गएपछि जिल्ला प्रशासन कार्यालय सुनसरीले कर्फ्यु आदेश जारी गरेको छ।
गृह मन्त्रालयले सुनसरीका प्रमुख जिल्ला अधिकारी, नेपाल प्रहरी, सशस्त्र प्रहरी र कोशी प्रदेश प्रहरी नेतृत्वमा परिवर्तन गरेपछि नयाँ नेतृत्वले अवस्था नियन्त्रणमा ल्याउने अपेक्षा गरिएको थियो। तर स्थानीयवासीका अनुसार प्रभावकारी समन्वय र परिस्थितिअनुसारको रणनीति अभावमा आन्दोलन थप उग्र बन्दै गएको छ।
मंगलबार बिहानदेखि इटहरीको पकलीदेखि कोशी ब्यारेजसम्मको महेन्द्र राजमार्ग अवरुद्ध छ। इनरुवा नगरपालिका, कोशी गाउँपालिका, भोक्राहा नरसिंह गाउँपालिका, हरिनगर गाउँपालिका र देवानगञ्ज गाउँपालिकाका विभिन्न स्थानमा प्रदर्शन जारी रहेको जनाइएको छ।
स्थानीयका अनुसार आन्दोलनमा विभिन्न समूहको सहभागिता बढ्दै जाँदा अवस्था नियन्त्रण गर्न सुरक्षा निकायलाई चुनौती थपिएको छ। केही समूहले प्रदर्शनको क्रममा तोडफोड, लुटपाट र आगजनी गरेको आरोपसमेत लगाइएको छ। स्थिति नियन्त्रणमा लिन नेपाली सेना परिचालन गरिए पनि अवस्था पूर्ण रूपमा सहज हुन सकेको छैन।
सुनसरीका प्रमुख जिल्ला अधिकारी ईश्वरीप्रसाद अर्यालले सबै पक्षलाई संयम अपनाउन, अपुष्ट सूचना र अफवाहमा विश्वास नगर्न तथा शान्ति–सुरक्षा कायम गर्न सहयोग गर्न आग्रह गरेका छन्।
यसैबीच, जिल्ला प्रशासन कार्यालय सुनसरीले मंगलबार दिउँसो साढे ३ बजेदेखि लागू हुने गरी अनिश्चितकालीन कर्फ्यु आदेश जारी गरेको छ। महेन्द्र राजमार्गको तोकिएको क्षेत्र र इनरुवा बजार क्षेत्रभित्र कुनै पनि प्रकारको भेला, जुलुस, प्रदर्शन, सभा, बैठक तथा घेराउ गर्न रोक लगाइएको छ।
सुरक्षा नेतृत्वमा हेरफेर
कप्तानगञ्ज घटनापछि गृह मन्त्रालयले सुनसरीको सुरक्षा नेतृत्वमा परिवर्तन गरेको थियो। जिल्ला प्रहरी कार्यालय सुनसरीका प्रहरी उपरीक्षक (एसपी) केशवकुमार थेबेको स्थानमा गौतमबुद्ध अन्तर्राष्ट्रिय विमानस्थलमा कार्यरत एसपी पुष्पराज मल्ललाई पठाइएको छ।
त्यस्तै, सशस्त्र प्रहरी बल नम्बर ४ गण सुनसरीका प्रमुख एसपी श्यामकुमार कार्कीलाई प्रधान कार्यालय हलचोक सरुवा गरी उनको स्थानमा एसपी लवकुमार सापकोटालाई जिम्मेवारी दिइएको छ।
गृह मन्त्रालयले सुनसरीका प्रमुख जिल्ला अधिकारी बासुदेव घिमिरेलाई मन्त्रालयमा तानेर संखुवासभाका प्रमुख जिल्ला अधिकारी ईश्वरीप्रसाद अर्याललाई सुनसरी पठाएको छ। यसैगरी कोशी प्रदेश प्रहरी कार्यालयका प्रमुख डीआईजी विनोद घिमिरेलाई प्रहरी प्रधान कार्यालय सरुवा गरी उनको स्थानमा डीआईजी शेखर खनाललाई जिम्मेवारी दिइएको छ।
