काठमाडौं । संघीय संसद्अन्तर्गतका दुई संसदीय समितिको बैठक आज बस्ने भएको छ। संघीयता सबलीकरण तथा राष्ट्रिय सरोकार समिति तथा संसदीय सुनुवाइ समितिको बैठकका लागि कार्यसूची तय गरिएको संघीय संसद् सचिवालयले जनाएको छ।
संसदीय सुनुवाइ समितिको बैठकमा प्रमुख निर्वाचन आयुक्तका लागि प्रस्तावित मानबहादुर कार्कीविरुद्ध परेका उजुरीबारे उजुरीकर्तासँग छलफल गरिनेछ। त्यसपछि प्रस्तावित प्रमुख निर्वाचन आयुक्त कार्कीलाई समितिसमक्ष उपस्थित गराई संसदीय सुनुवाइ सञ्चालन गरिने कार्यसूची रहेको छ। समितिको बैठक बिहान ११ः१५ बजे बस्ने तय भएको छ।
यसअघि मंगलबार समितिले निर्वाचन आयुक्तका लागि प्रस्तावित गुरुप्रसाद वाग्ले र डा. राजीव सुब्बासँग संसदीय सुनुवाइ सम्पन्न गरेको थियो।
यस्तै, संघीयता सबलीकरण तथा राष्ट्रिय सरोकार समितिको बैठक बिहान ११ः०० बजे बस्नेछ। बैठकमा आर्थिक वर्ष २०८३/८४ को वार्षिक कार्ययोजनामाथि छलफल गर्ने कार्यसूची रहेको संघीय संसद् सचिवालयले जनाएको छ।
