काठमाडौं। सप्तरीको सदरमुकाम राजविराज नगरपालिकाका विभिन्न क्षेत्रमा शुक्रबार बिहान ५ बजेदेखि अर्को सूचना जारी नभएसम्मका लागि कर्फ्यु आदेश लागू गरिएको छ।
जिल्ला प्रशासन कार्यालय सप्तरीले सार्वजनिक गरेको सूचनाअनुसार जिल्लाको शान्तिसुरक्षा अवस्था कायम राख्ने उद्देश्यले जिल्ला सुरक्षा समितिको सिफारिसका आधारमा कर्फ्यु जारी गरिएको हो।
प्रमुख जिल्ला अधिकारी श्यामकृष्ण थापाले जारी गरेको आदेशअनुसार कर्फ्युको दायरा राजविराज नगरपालिकाभित्र पूर्वतर्फ खाँडो खोला, पश्चिमतर्फ हुलाकी राजमार्गअन्तर्गत जुडनी–ढलही क्षेत्र, उत्तरतर्फ रूपनी रोडको बसबिट्टी चोक तथा दक्षिणतर्फ कोशी पश्चिम मूल नहर हुँदै विष्णुपुर गाउँपालिकाको सीमासम्म रहनेछ।
प्रशासनले कर्फ्यु अवधिभर तोकिएको क्षेत्रमा अनावश्यक आवतजावत नगर्न तथा सुरक्षा निकायको निर्देशन पालना गर्न सर्वसाधारणलाई अनुरोध गरेको छ। कर्फ्यु कहिलेसम्म कायम रहने भन्नेबारे भने अर्को आदेशमार्फत जानकारी गराइने प्रशासनले जनाएको छ।
