काठमाडौं । जिल्ला प्रशासन कार्यालय धनुषाले जनकपुरधाम क्षेत्रमा जारी कर्फ्यु आदेश यथावत् रहेको जनाएको छ। प्रशासनका अनुसार सर्वसाधारणले अत्यावश्यक सामग्री खरिदका लागि बिहान ६ बजेदेखि ८ बजेसम्म घरबाहिर निस्कन पाउनेछन्।
कर्फ्यु अवधिमा अत्यावश्यक सेवाहरू भने नियमित सञ्चालन हुने प्रशासनले स्पष्ट पारेको छ। अस्पताल, औषधि पसल, हवाई सेवा, ग्यास आपूर्ति, पेट्रोलियम पदार्थको ढुवानी तथा बिक्री, एम्बुलेन्स, दमकल, शववाहन, खानेपानी र दूध ढुवानी गर्ने सवारी साधनलाई सञ्चालन अनुमति दिइएको छ।
यस्तै, स्वास्थ्यकर्मी, सरकारी कर्मचारी, सञ्चारकर्मी, रेडक्रसकर्मी, तीर्थयात्री, बिरामी तथा विमानस्थल जाने–आउने यात्रुलाई आवश्यक परिचयपत्र वा हवाई टिकटको आधारमा आवतजावत गर्न दिइने जिल्ला प्रशासन कार्यालयले जनाएको छ।
प्रशासनले कर्फ्यु आदेश पालना गर्दै शान्ति सुरक्षा कायम गर्न सहयोग गर्न सर्वसाधारणलाई आग्रह गरेको छ।
