काठमाडौं : कुवेतको उत्तरी क्षेत्रमा भएको ड्रोन आक्रमणमा एक नेपाली नागरिकको मृत्यु भएको छ।
कुवेतस्थित नेपाली दूतावासका अनुसार तेह्रथुमका ४४ वर्षीय सोमकुमार तामाङको उक्त घटनामा ज्यान गएको हो। तामाङ कुवेतमा सवारी चालकका रूपमा कार्यरत थिए।
दूतावासले कुवेतको परराष्ट्र मन्त्रालयमार्फत घटनाबारे आधिकारिक जानकारी प्राप्त भएको जनाएको छ। घटनाप्रति दुःख व्यक्त गर्दै दूतावासले मृतकको परिवारप्रति समवेदना प्रकट गरेको छ।
तामाङको पार्थिव शरीर नेपाल ल्याउने प्रक्रिया अघि बढाइएको दूतावासले जनाएको छ। यसका लागि सम्बन्धित निकायहरूसँग आवश्यक समन्वय गरी कानुनी तथा प्रशासनिक प्रक्रिया पूरा गरिने बताइएको छ।
यसैबीच, कुवेतमा रहेका नेपाली नागरिकलाई दूतावासले उच्च सतर्कता अपनाउन आग्रह गरेको छ। कुवेत सरकारले जारी गरेका सुरक्षा निर्देशन तथा मापदण्डको पालना गर्दै सुरक्षित स्थानमा रहन सबै नेपालीलाई अनुरोध गरिएको छ।
