काठमाडौं : भारतको महाराष्ट्रस्थित भिवण्डीमा चार तले भवन भत्किँदा सात जनाको मृत्यु भएको छ। भारी वर्षापछि आएको बाढीका कारण भवन कमजोर बनेर भत्किएको प्रारम्भिक अनुमान गरिएको छ।
घटनापछि भग्नावशेषमा दुई जना अझै फसेको आशंकामा उद्धार टोलीले खोजी तथा उद्धार कार्य जारी राखेको छ।
स्थानीय विधायक महेश चौगुलेका अनुसार उक्त भवनलाई यसअघि नै जोखिमयुक्त संरचनाका रूपमा घोषणा गरिएको थियो। भवनमा बसोबास गर्ने मानिसहरूलाई अन्यत्र सारिएको भए पनि केही व्यक्ति त्यहाँ मर्मतसम्बन्धी काम गरिरहेका बेला दुर्घटना भएको बताइएको छ।
घटनामा परेका केही मजदुर र भग्नावशेषमा फसेका व्यक्ति एउटै परिवारका सदस्य हुन सक्ने आशंका गरिएको छ। उद्धारकर्मीहरूले भग्नावशेष हटाउँदै थप विवरण संकलन गरिरहेका छन्।
भवन भत्किनुको कारण भारी वर्षा र पानीको प्रभाव हुन सक्ने बताइए पनि घटनाको वास्तविक कारणबारे विस्तृत अनुसन्धान भइरहेको छ।
