काठमाडौँ । चितवनको कालिका नगरपालिकाले भूमि व्यवस्थापनसम्बन्धी सेवा औपचारिक रूपमा सुरु गरेको छ। जिल्लाका सात स्थानीय तहमध्ये आफ्नै कार्यालयबाट यस्तो सेवा सञ्चालन गर्ने कालिका पहिलो पालिका बनेको हो।
नगरप्रमुख विनोद रेग्मीका अनुसार नगरपालिकाले नापनक्सा, जग्गा प्रशासन तथा विभिन्न लिखत पारितसम्बन्धी सेवा आफ्नै कार्यालयबाट प्रदान गर्न थालेको हो। नेपालको संविधानले भूमि प्रशासनसम्बन्धी अधिकार स्थानीय तहलाई दिएको भए पनि आवश्यक पूर्वाधार र जनशक्तिको अभावका कारण हालसम्म यी सेवा भूमिसुधार, मालपोत तथा नापी कार्यालयमार्फत सञ्चालन हुँदै आएका थिए। आवश्यक तयारी पूरा भएपछि नगरपालिकाले सेवा सञ्चालनमा ल्याएको उनले बताए।
सेवा सुरु भएसँगै कालिका नगरपालिकाका ११ वटै वडाका नागरिकले भूमि प्रशासनसम्बन्धी अधिकांश सेवा आफ्नै पालिकाबाट प्राप्त गर्ने भएका छन्। यसअघि उनीहरू भरतपुरस्थित मालपोत र नापी कार्यालयमा पुग्नुपर्ने बाध्यता थियो। स्थानीयस्तरमै सेवा उपलब्ध हुँदा सेवाग्राहीको समय र खर्च बचत हुनुका साथै सेवा प्रवाह पनि थप छिटो, सहज र प्रभावकारी हुने नगरपालिकाको विश्वास छ।
हालका लागि जग्गाको स्रेस्ता कायम गर्ने सेवा भने भरतपुरबाटै प्रदान गरिनेछ। अन्य अधिकांश भूमि प्रशासनसम्बन्धी सेवा भने नगरपालिकाबाटै सञ्चालन हुनेछ।
भूमि प्रशासन अधिकृत रामप्रसाद अधिकारीका अनुसार जग्गाधनी दर्ता प्रमाणपुर्जा, लिखत पारित, मृत्युपछिको नामसारी, राजीनामा दस्तखत पारित, छोडपत्र, बकसपत्र तथा शेषपछिको लिखतसम्बन्धी सेवा नगरपालिकाबाटै उपलब्ध हुनेछ।
हाल चितवनमा भरतपुर, चनौली, माडी र खैरहनीस्थित मालपोत तथा नापी कार्यालयले भूमि प्रशासनसम्बन्धी सेवा प्रदान गर्दै आएका छन्।
