काठमाडौं । प्रधानमन्त्री बालेन शाहले मधेस प्रदेशमा पछिल्लो समय देखिएका हिंसात्मक घटनाक्रम, सामाजिक सद्भाव र सङ्घीयताको विषयमा मधेस केन्द्रित राजनीतिक दलका नेताहरूसँग छलफल गरेका छन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा मधेसी नेताहरूले सुनसरीमा सामान्य विवादबाट सुरु भएको घटना मधेसका अन्य जिल्लासम्म फैलिनुमा सरकारी संयन्त्रको ढिलासुस्ती र निष्क्रियता जिम्मेवार रहेको भन्दै आलोचना गरेका छन्।
छलफलमा राष्ट्रिय मुक्ति पार्टीका अध्यक्ष राजेन्द्र महतो, जनमत पार्टीका अध्यक्ष डा. सिके राउतलगायत नेताहरू सहभागी थिए। नेताहरूले रास्वपाको चितवन महाधिवेशनबाट सङ्घीयताविरोधी सन्देश गएको विषय पनि उठाएका थिए।
मधेसी नेताहरूले चुनावका बेला सङ्घीयता बलियो बनाउने प्रतिबद्धता व्यक्त भए पनि व्यवहारमा त्यसअनुसार काम हुन नसक्दा जनतामा असन्तुष्टि बढेको धारणा राखेका छन्।
नेताहरूको चासो र आलोचनापछि प्रधानमन्त्री शाहले आफू र आफ्नो पार्टी सङ्घीयताको विरोधी नरहेको स्पष्ट पारेका छन्। उनले आफू काठमाडौंको मेयर रहँदा प्राप्त अधिकारको प्रयोग गरेको उदाहरण दिँदै प्रदेश सरकारले पनि संविधानले दिएको अधिकार पूर्ण रूपमा प्रयोग गरेर सङ्घीयता बलियो बनाउनुपर्नेमा जोड दिए।
भेटपछि सञ्चारकर्मीसँग कुरा गर्दै जनमत पार्टीका अध्यक्ष डा. सिके राउतले मधेसका समस्या, सामाजिक सद्भाव र वर्तमान अवस्थाबारे प्रधानमन्त्रीले मधेस केन्द्रित दलहरूलाई बोलाएर छलफल गर्नु सकारात्मक कदम भएको बताए।
नेताहरूले सामान्य विवादले साम्प्रदायिक रूप लिनु देशका लागि गम्भीर विषय भएको भन्दै यस्ता घटना दोहोरिन नदिन सरकारलाई संवेदनशील र प्रभावकारी भूमिका खेल्न आग्रह गरेका छन्।
