काठमाडौं । पाकिस्तानको ब्रड पिकमा गएको हिमपहिरोपछि बेपत्ता भएका आरोहीहरूको खोजीका क्रममा चार वटा शव फेला परेका छन्।
अल्पाइन क्लब अफ पाकिस्तानका अध्यक्ष मेजर जनरल इरफान अरशदका अनुसार खोजी तथा उद्धार अभियानका क्रममा चार शव भेटिएका हुन्। फेला परेका शवमध्ये ओमानकी आरोही नधिरा अहमद अब्दुल्लाह अल हार्थी र नेपाली आरोही पुरबहादुर गुरुङको पहिचान भएको छ। बाँकी दुई शवको पहिचान हुन बाँकी रहेको छ।
शव भेटिएको पुष्टि भए पनि हिमपहिरोमा परी कति आरोहीको मृत्यु भएको हो भन्नेबारे थप विवरण आउन बाँकी रहेको जनाइएको छ। खोजी तथा उद्धार कार्य अझै जारी छ।
इन्टरनेसनल फेडरेसन अफ माउन्टेन गाइड एसोसिएसन्सबाट प्रमाणित गाइड रहेका पुरबहादुर गुरुङ विश्वका ८ हजार मिटरभन्दा अग्ला १४ वटै हिमाल आरोहण गर्ने लक्ष्यको नजिक पुगेका आरोही हुन्।
गत वसन्त ऋतुमा मात्रै उनले नेपालका तीन वटा ८ हजार मिटरभन्दा अग्ला हिमाल सफलतापूर्वक आरोहण गरेका थिए। सो सिजनको अन्त्यसम्ममा उनको नाममा सगरमाथाको १० पटक आरोहणसहित १२ वटा आठ हजारी हिमाल चढेको कीर्तिमान रहेको थियो।
गुरुङ सय वर्ष पुरानो जुत्ता फेला पार्ने टोलीका सदस्यसमेत थिए। उक्त जुत्तामा ‘ए.सी. इरभिन’ लेखिएको थियो, जुन सन् १९२४ मा जर्ज मेलोरीसँगै सगरमाथामा बेपत्ता भएका बेलायती आरोही एन्ड्रयु ‘स्यान्डी’ इरभिनको भएको विश्वास गरिएको छ।
