काठमाडौं । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री निशा मेहताले अनशनरत नर्स ज्योति रानाभाटको सत्याग्रहप्रति आफ्नो गम्भीर ध्यानाकर्षण भएको बताएकी छन्।
सामाजिक सञ्जाल फेसबुकमार्फत मन्त्री मेहताले आफू स्वास्थ्यकर्मीसमेत भएकाले पाँच दिनदेखि अनशनरत रानाभाटको माग र स्वास्थ्य अवस्थाप्रति संवेदनशील रहेको उल्लेख गरेकी छन्।
उनले समस्या समाधानका लागि संवाद नै प्रभावकारी माध्यम भएको बताउँदै स्वास्थ्य तथा खाद्य स्वच्छता मन्त्रालयले सुरुदेखि नै वार्ता समिति, अतिरिक्त सचिव, सचिव तथा सम्बन्धित निकायमार्फत पटक–पटक संवाद र समन्वयको प्रयास गर्दै आएको जानकारी दिएकी छन्।
मन्त्री मेहताका अनुसार स्वास्थ्य तथा शिक्षा सम्बन्धी संसदीय समितिका सभापतिले पनि यस विषयमा वार्ताका लागि निरन्तर पहल गरिरहेका छन्।
उनले हाल सुनसरीमा भएको घटनाको व्यवस्थापन, पीडित परिवारसँगको समन्वय र स्थानीय अवस्था सामान्य बनाउन आफू सुनसरीमै रहेकाले त्यहाँको जिम्मेवारी प्राथमिकतामा रहेको बताएकी छन्।
यद्यपि नर्स रानाभाटको विषयलाई आफूले निरन्तर प्राथमिकतामा राखेको उल्लेख गर्दै मन्त्री मेहताले आज पनि सम्बन्धित पक्षसँग पुनः वार्ता गर्ने तयारी भइरहेको जानकारी दिएकी छन्। उनले सकारात्मक निष्कर्षमा पुग्न सबै पक्षको सहयोग आवश्यक रहेको बताएकी छन्।
