काठमाडौँ । नेपाल राष्ट्र बैंकले वित्तीय प्रणालीमा देखिएको अत्यधिक तरलता व्यवस्थापन गर्न पुनः ठूलो परिमाणमा रकम प्रशोचन गर्ने भएको छ। मौद्रिक व्यवस्थापनलाई प्रभावकारी बनाउने उद्देश्यले केन्द्रीय बैंकले बजारबाट थप रु. ८५ अर्ब निक्षेप संकलन गर्न लागेको हो।
राष्ट्र बैंकको मौद्रिक व्यवस्थापन विभागका अनुसार उक्त निक्षेप ९१ दिन (तीन महिना) अवधिका लागि संकलन गरिनेछ। यसका लागि इच्छुक ‘क’, ‘ख’ र ‘ग’ वर्गका बैंक तथा वित्तीय संस्थाहरूले आज दिउँसो ३:०० बजेसम्म अनलाइन ‘बिडिङ सिस्टम सफ्टवेयर’ (OBSS) मार्फत बोलकबोलमा सहभागी हुन सक्नेछन्।
बैंकका अनुसार निक्षेप संकलनको अन्तिम विवरण बोलकबोल प्रक्रिया सम्पन्न भएपछि सार्वजनिक गरिनेछ। यसको ब्याजदर भने खुला प्रतिस्पर्धात्मक प्रक्रियाबाट निर्धारण हुनेछ।
बोलकबोलमा सहभागी हुने बैंक तथा वित्तीय संस्थाले न्यूनतम रु. १० करोड र त्यसपछि रु. ५ करोडका गुणांकमा आफूले चाहेको रकमका लागि आवेदन दिन सक्नेछन्। एउटै संस्थाले फरक–फरक ब्याजदर प्रस्ताव गर्दै एकभन्दा बढी आवेदनसमेत पेस गर्न पाउने व्यवस्था गरिएको छ।
राष्ट्र बैंकका अनुसार यस प्रक्रियामार्फत संकलन गरिएको निक्षेपको साँवा तथा ब्याज आगामी कात्तिक १७ गते भुक्तानी गरिनेछ।
तरलता व्यवस्थापनका लागि निरन्तर हस्तक्षेप
वित्तीय बजारमा लगानीयोग्य रकम अत्यधिक हुँदा ब्याजदरमा अनावश्यक उतारचढाव आउन नदिन राष्ट्र बैंकले समय–समयमा निक्षेप संकलन उपकरण (Deposit Collection Facility) मार्फत बजारबाट तरलता प्रशोचन गर्दै आएको छ।
हाल बैंक तथा वित्तीय संस्थामा निक्षेप निरन्तर बढिरहेको तर कर्जाको माग अपेक्षाकृत सुस्त रहेको अवस्थाका कारण प्रणालीमा अधिक तरलता थुप्रिएको छ। यही अवस्थालाई व्यवस्थापन गर्न केन्द्रीय बैंकले खुला बजार कारोबारमार्फत अल्पकालीन तरलता खिच्ने रणनीतिलाई निरन्तरता दिएको हो।
