काठमाडौं । राष्ट्रिय स्वतन्त्र पार्टी (रास्वपा) का सांसद राजुनाथ पाण्डे नेपाली सेनाको गणको पर्खाल भत्काउने विषयलाई लिएर विवादमा परेका छन्। काठमाडौं क्षेत्र नम्बर–३ बाट निर्वाचित सांसद पाण्डेले गोकर्णस्थित नेपाल ट्रस्टको जग्गामा बाटो विस्तार गर्ने क्रममा नेपाली सेनाका अधिकारीसँग गरेको चर्काचर्कीको भिडियो सामाजिक सञ्जालमा सार्वजनिक भएपछि यो विषय चर्चामा आएको हो।
बाटो विस्तारका लागि भन्दै पाण्डे सोमबार डोजरसहित गोकर्ण पुगेका थिए। उक्त क्षेत्रमा नेपाली सेनाको गण रहेको र सेनाले निर्माण गरेको पर्खाल प्रक्रिया पूरा नगरी भत्काइएको आरोप लागेको छ। सेनालाई पूर्वजानकारी नदिई तथा औपचारिक पत्राचारबिनै पर्खाल भत्काइएको भन्दै विरोध भइरहेको छ।
सामाजिक सञ्जालमा सार्वजनिक भएको भिडियोमा सेनाका क्याप्टेनले प्रक्रिया पूरा गरेर अघि बढ्न आग्रह गरिरहेको देखिन्छ भने सांसद पाण्डेले काम नरोक्ने अडान लिएको देखिन्छ। पाण्डेले आधिकारिक पत्र आवश्यक भए पनि काम जारी रहने आशय व्यक्त गरेको भन्दै आलोचना भएको छ।
नेपाली सेनाका प्रवक्ता राजाराम बस्नेतले सार्वजनिक भएको भिडियो र घटनाबारे सम्बन्धित निकायलाई जानकारी गराइएको बताएका छन्। उनले सेनाको पर्खालसमेत भत्किएको र घटनाबारे आवश्यक अनुसन्धान भइरहेको जानकारी दिए।
गोकर्णेश्वर नगरपालिकाका मेयर दीपककुमार रिसालले भने उक्त क्षेत्रमा बाटो साँघुरो भएकाले स्थानीयबाट लामो समयदेखि गुनासो आइरहेको बताए। उनका अनुसार बाटो विस्तार र संरचना व्यवस्थापनका लागि नगरपालिकाले बजेटसमेत छुट्याएको छ।
नगरपालिकाले नेपाल ट्रस्टको जग्गामा रहेको पर्खाल सार्न सहमतिका लागि सम्बन्धित निकायलाई पत्र पठाएको जनाएको छ। गोकर्णेश्वर–४ माकलबारीदेखि गोकर्ण मन्दिरसम्मको करिब दुई सय मिटर क्षेत्रमा रहेको पर्खालका कारण सडक साँघुरो भएको भन्दै पर्खाल सार्न अनुमति माग गरिएको थियो।
नगरपालिकाको १७औं नगरसभाले उक्त सडक निर्माण तथा स्तरोन्नतिका लागि चालु आर्थिक वर्षमा २५ लाख रुपैयाँ बजेट विनियोजन गरेको थियो। मेयर रिसालले प्रक्रिया पूरा गरेर काम अघि बढाउन सकिने अवस्थामा जबरजस्ती पर्खाल भत्काउनु उचित नभएको टिप्पणी गरेका छन्।
सांसद पाण्डेले भने स्थानीयबाट बाटो साँघुरो भएको गुनासो आएपछि समस्या समाधानका लागि आफू घटनास्थल पुगेको बताएका छन्। उनले लामो समयदेखि रोकिएको सामान्य काम भएकाले तत्काल समाधानका लागि पर्खाल हटाइएको दाबी गरेका छन्।
नेपाल ट्रस्टको जग्गामा रहेको नेपाली सेनाको ब्यारेक क्षेत्रको पर्खाल भत्काउने क्रममा सेनाले रोक्ने प्रयास गरेको थियो। उक्त क्षेत्र गोकर्णदेखि दक्षिणढोकासम्मको वन क्षेत्रसँग जोडिएको र वन्यजन्तु संरक्षणका लागि सेनाले सुरक्षा व्यवस्था गर्दै आएको बताइएको छ।
यसैबीच, प्रधानसेनापति अशोक सिग्देलले घटनाबारे प्रधानमन्त्री वालेन्द्र शाहको ध्यानाकर्षण गराएका छन्। प्रधानमन्त्रीको सचिवालयका अनुसार त्यसपछि सांसद पाण्डेलाई प्रधानमन्त्री कार्यालय बोलाएर घटनाबारे सचेत गराइएको छ।
