काठमाडौँ । इजरायली प्रधानमन्त्री बेन्जामिन नेतान्याहुले अमेरिकी राष्ट्रपति डोनाल्ड ट्रम्प प्रशासनको गाजा सम्झौतासम्बन्धी प्रस्तावमा सार्वजनिक रूपमा असहमति जनाउँदै हमास पूर्ण रूपमा निःशस्त्र नभएसम्म इजरायली सेना गाजाबाट पछि नहट्ने बताएका छन्।
सामाजिक सञ्जालमा सार्वजनिक गरेको भिडियो सन्देशमा नेतान्याहुले गाजामा इजरायलको सुरक्षा र सैन्य उपस्थितिमा कुनै सम्झौता नहुने स्पष्ट पारे। उनले इजरायली सेनालाई देश र नागरिकको सुरक्षाका लागि आवश्यक सबै कदम चाल्न निर्देशन दिइएको पनि बताए।
यसैबीच, गाजामा युद्धपछिको व्यवस्थापनका लागि गठित ‘बोर्ड अफ पिस’ले पनि हमासको पूर्ण निःशस्त्रीकरण नभएसम्म इजरायली रक्षा बल (आईडीएफ) ‘येलो लाइन’भन्दा पछाडि नहट्ने स्पष्ट गरेको छ। बोर्डले केही सञ्चारमाध्यममा आएका आंशिक वा भ्रामक विवरणलाई अस्वीकार गर्दै इजरायली फिर्ता हमासले आफ्ना सबै हतियार र सुरुङसहितको सैन्य संरचना पूर्ण रूपमा विघटन गरेपछि मात्र सुरु हुने जनाएको छ।
‘येलो लाइन’ले गाजाभित्र इजरायली सेनाको नियन्त्रणमा रहेको सुरक्षा क्षेत्रलाई जनाउँछ। इजरायली अधिकारीहरूले हमास र अन्य सशस्त्र समूहबाट हुने सम्भावित सुरक्षा जोखिम अन्त्य नभएसम्म उक्त क्षेत्रमा नियन्त्रण कायम रहने बताएका छन्।
यसअघि बोर्ड अफ पिसका उच्च प्रतिनिधि निकोलाय म्लादेनोभ र प्रधानमन्त्री नेतान्याहुबीच जेरुसेलममा भएको उच्चस्तरीय वार्तामा गाजामा सशस्त्र शासनको अन्त्य गर्दै नागरिक प्रशासन स्थापना गर्ने प्रक्रिया, हमासको निःशस्त्रीकरण तथा सुरक्षा व्यवस्थाबारे छलफल भएको थियो।
अमेरिकी राष्ट्रपति डोनाल्ड ट्रम्पले हालै हमासको निःशस्त्रीकरणसम्बन्धी प्रस्तावलाई गाजा शान्ति प्रक्रियाको महत्वपूर्ण उपलब्धि बताएका थिए। तर नेतान्याहुले इजरायलको सुरक्षा सुनिश्चित नभएसम्म गाजाबाट सेना फिर्ता नहुने अडान दोहोर्याएका छन्।
