काठमाडौँ । देशका विभिन्न क्षेत्रमा आएको बाढी र पहिरोका कारण तीन वटा सडकखण्ड पूर्ण रूपमा अवरुद्ध भएका छन् भने छ वटा सडकखण्डमा आंशिक प्रभाव परेको सडक विभागले जनाएको छ ।
विभागका अनुसार पहिरोका कारण अवरुद्ध भएका २४ वटा सडकखण्ड सामान्य मर्मतपछि सञ्चालनमा आएका छन् । नेपाल प्रहरीका अनुसार पहिरो, नदी कटान, हिलो तथा सडक भासिने समस्याका कारण विभिन्न राजमार्ग प्रभावित भएका हुन् ।
बाढीको जोखिमलाई मध्यनजर गर्दै बिपी राजमार्गअन्तर्गत धुलिखेल–सिन्धुली खण्डमा बेलुका ६ बजेदेखि बिहान ४ बजेसम्म सवारीसाधन सञ्चालनमा रोक लगाइएको छ ।
यस्तै, मकवानपुरको कान्ति लोकपथमा वर्षाका कारण बेलुका ५ बजेदेखि बिहान ५ बजेसम्म सबै प्रकारका सवारीसाधन सञ्चालनमा प्रतिबन्ध लगाइएको प्रहरीले जनाएको छ । इलाम नगरपालिका–९ राजदुवालीस्थित मेची राजमार्ग पनि वर्षाका कारण सडक हिलो भई पूर्ण रूपमा अवरुद्ध भएको छ । उक्त क्षेत्रमा यात्रु तथा सवारीसाधनका लागि वैकल्पिक मार्ग प्रयोग गर्ने व्यवस्था मिलाइएको प्रहरीले जनाएको छ ।
सिन्धुपाल्चोकस्थित अरनिको राजमार्ग विभिन्न तीन स्थानमा पहिरो, लेदो र सडक भासिएका कारण पूर्ण रूपमा बन्द रहेको छ । भोटेकोशी गाउँपालिका–४ जिरोकिलो, कोदारी र लिपिङ क्षेत्रमा सडक अवरुद्ध भएको प्रहरीले जनाएको छ ।
दोलखाको लामोसाँघु–रामेछाप सडकखण्डअन्तर्गत तामाकोशी गाउँपालिका–५ किर्नेटारमा नदी कटानका कारण सडक पूर्ण रूपमा बन्द भएको छ । उक्त क्षेत्रमा खिम्ती ग्रामीण विद्युत् सहकारी संस्थाको परिसर हुँदै वैकल्पिक मार्ग सञ्चालनमा ल्याइएको छ ।
प्रहरीले वर्षाका कारण सडकको अवस्था जुनसुकै बेला परिवर्तन हुन सक्ने भएकाले यात्रा गर्नुअघि सम्बन्धित निकायबाट सडक अवस्थाबारे जानकारी लिन र आवश्यक सतर्कता अपनाउन सर्वसाधारणलाई आग्रह गरेको छ ।
