काठमाडौं। अविरल वर्षापछि गएको पहिरोले घर र गोठ पुरिँदा रोल्पाको थबाङ गाउँपालिका–५, बोटलबारामा दुई जनाको मृत्यु भएको छ भने दुई जना घाइते भएका छन्।
जिल्ला प्रहरी कार्यालयका अनुसार मृत्यु हुनेमा थबाङ–५ बोटलबाराकी १८ वर्षीया शान्ति पुन मगर र सोही स्थानका ६० वर्षीय कमलबहादुर पुन मगर रहेका छन्। पहिरोमा परी घाइते हुनेमा २२ वर्षीय हिमाल पुन मगर र २५ वर्षीय सञ्जय घर्ती मगर रहेका छन्।
प्रहरीका अनुसार साउन २७ गते दिउँसोदेखि परेको अविरल वर्षाका कारण पहिरो जाँदा घरसहित गोठ पुरिएका थिए। घटनाको जानकारी पाएपछि प्रहरीले राति घटनास्थलमा टोली पठाएको थियो।
प्रहरी र स्थानीयवासीको सहयोगमा पहिरोमा पुरिएका घाइतेलाई उद्धार गरी उपचारका लागि स्वास्थ्य संस्थामा पठाइएको छ। दुवै घाइतेको अवस्था गम्भीर रहेको प्रहरीले जनाएको छ।
प्रहरीको प्रारम्भिक अनुमानअनुसार पहिरोका कारण करिब छवटा घर तथा गोठमा क्षति पुगेको छ। घटनाको थप विवरण आउन बाँकी रहेको जिल्ला प्रहरी कार्यालयले जनाएको छ।
