काठमाडौं। नेपाली कांग्रेसले निजी क्षेत्रलाई सहयोग र प्रवर्द्धन गर्दै अर्थतन्त्र सुधारका लागि सरकारले प्रभावकारी कदम चाल्नुपर्नेमा जोड दिएको छ। कांग्रेस केन्द्रीय कार्यसमितिको बैठकपछि निर्णय सार्वजनिक गर्दै पार्टी प्रवक्ता देवराज चालिसेले अर्थतन्त्र सुधारका लागि सरकारले अघि बढाउने सकारात्मक कदममा पार्टीको सहयोग रहने बताए।
चालिसेले देशको आर्थिक विकास, उत्पादन वृद्धि, राजस्व सङ्कलन तथा रोजगारी सिर्जनामा निजी क्षेत्रको महत्वपूर्ण भूमिका रहेको बताए। निजी क्षेत्र नेपालको अर्थतन्त्रको मेरुदण्ड भएकाले त्यसलाई कमजोर बनाउने कुनै पनि नीति लिन नहुने कांग्रेसको धारणा रहेको उनले बताए।
कांग्रेसले निजी क्षेत्रलाई नियन्त्रण गर्ने खालका कानुनी व्यवस्था सुधार गर्नुपर्नेमा समेत जोड दिएको छ। निजी क्षेत्रको लगानी र व्यावसायिक गतिविधिलाई सहज बनाउने वातावरण तयार गर्न सरकार जिम्मेवार हुनुपर्ने पार्टीको निष्कर्ष छ।
लगानीकर्ताको मनोबल बढाउन, पुँजी पलायन रोक्न तथा स्वदेशी र विदेशी लगानी आकर्षित गर्न सरकारले स्पष्ट, स्थिर र दीर्घकालीन आर्थिक नीति ल्याउनुपर्ने कांग्रेसले माग गरेको छ।
सभापति गगनकुमार थापाको सभापतित्वमा साउन २४ गतेदेखि पार्टी केन्द्रीय कार्यालय ललितपुरमा जारी बैठकमा आज २८ जना केन्द्रीय सदस्यले धारणा राखेका छन्। छलफल जारी रहेकाले केन्द्रीय कार्यसमितिको बैठक आज पुनः बस्ने कांग्रेसले जनाएको छ।
