काठमाडौं। रोल्पाको थबाङ गाउँपालिका–५ कोटलबारामा पहिरोमा परेर १० जना अझै बेपत्ता रहेका छन्। अविरल वर्षापछि बुधबार साँझ आएको पहिरोले स्थानीय कमलबहादुर पुन मगरको घरसहित करिब आधा दर्जन घर तथा गोठ पुरिएपछि बेपत्ताको खोजी तथा उद्धार कार्य जारी छ।
जिल्ला प्रहरी कार्यालय रोल्पाका अनुसार पहिरोमा परेका २२ वर्षीय हिमाल पुन मगर र २५ वर्षीय सञ्जय घर्ती मगरलाई प्रहरी तथा स्थानीयवासीको सहयोगमा उद्धार गरिएको छ। दुवैको अवस्था गम्भीर रहेको प्रहरीले जनाएको छ।
लगातार वर्षा भइरहेकाले घटनास्थलमा उद्धार कार्य चुनौतीपूर्ण बनेको छ। जोखिमपूर्ण भू–भाग र प्रतिकूल मौसमका कारण बेपत्ताको खोजी तथा पुरिएका संरचनाबाट उद्धार गर्न कठिनाइ भइरहेको प्रहरीले जनाएको छ।
घटनास्थल जिल्ला सदरमुकामदेखि करिब २६ कोष उत्तरपूर्वमा पर्छ। प्रहरीले बेपत्ताको खोजीलाई तीव्रता दिँदै घटनास्थलको क्षति तथा अवस्थाबारे थप विवरण संकलन गरिरहेको जनाएको छ।
