काठमाडौं। उपत्यका अपराध अनुसन्धान कार्यालय र जिल्ला प्रहरी परिसर काठमाडौंको टोलीले पत्रकार किशोर श्रेष्ठको घर तथा कार्यालयमा खानतलासी गरेको छ।
प्रहरीले श्रेष्ठलाई बुधबार ललितपुरको कुसुन्तीबाट पक्राउ गरेको थियो। प्रहरी स्रोतका अनुसार पक्राउपछि राति करिब १ बजे उनको घरमा खानतलासी गरिएको हो। खानतलासीका क्रममा प्रहरीले घरबाट ल्यापटप र मोबाइल नियन्त्रणमा लिएको जनाएको छ।
बिहीबार बिहान प्रहरीले ललितपुरको झम्सीखेलस्थित ठाडोढुंगामा रहेको श्रेष्ठको जनआस्था साप्ताहिकको कार्यालयमा समेत खानतलासी गरेको छ। पछिल्लो जानकारीअनुसार प्रहरी टोली कार्यालयमै रहेको छ।
श्रेष्ठलाई हाल जिल्ला प्रहरी परिसर काठमाडौंको हिरासतमा राखिएको छ। उनलाई आज अदालतमा उपस्थित गराउने तयारी भइरहेको प्रहरी स्रोतले जनाएको छ।
