काठमाडौं : रोल्पाको थवाङ गाउँपालिका–५, कोटलबारामा गएराति अविरल वर्षाका कारण गएको पहिरोमा पुरिएर बेपत्ता भएकामध्ये थप एक जनाको शव फेला परेको छ।
जिल्ला प्रहरी कार्यालयका अनुसार घटनास्थलबाट स्थानीय ७१ वर्षीया मनरखी पुन मगरको शव फेला परेको हो। यससँगै पहिरोमा परी मृत्यु हुनेको संख्या तीन पुगेको छ।
प्रहरीका अनुसार पहिरोमा परी १० जना बेपत्ता भएका थिए। बेपत्ता हुनेमा ४० वर्षीया जुनकुमारी पुन मगर, ९ वर्षीय अशिम पुन मगर, ६ वर्षीय अशोक पुन मगर, ७५ वर्षीय डलबहादुर पुन मगर, ८० वर्षीय अजम्बर पुन मगर, ७८ वर्षीय बलबहादुर पुन मगर, ७२ वर्षीय लिलबहादुर पुन मगर, ७१ वर्षीय मनि पुन मगर र ६७ वर्षीया हस्तकला रोका मगर रहेका छन्।
प्रमुख जिल्ला अधिकारी तथा सुरक्षा निकायका प्रमुखसहितको टोली घटनास्थलमा पुगेर बेपत्ताहरूको खोजी तथा उद्धार कार्यमा संलग्न रहेको जिल्ला प्रशासनले जनाएको छ।
घटनास्थल रोल्पा र बागलुङको सीमा नजिक पर्छ। जिल्ला सदरमुकामबाट करिब २१ कोशको दूरीमा रहेको उक्त क्षेत्रमा बेपत्ताहरूको खोजी कार्य जारी रहेको प्रहरीले जनाएको छ।
