काठमाडौं । राप्रपा संसदीय दलका नेता ज्ञानेन्द्र शाहीले वैदेशिक रोजगारीको नाममा बढ्दै गएको ठगी र विदेशमा नेपाली श्रमिक अलपत्र पर्ने समस्या छानबिन गर्न संसदीय समिति गठन गर्न माग गरेका छन्।
मंगलबार प्रतिनिधिसभा बैठकमा बोल्दै शाहीले वैदेशिक रोजगारीसम्बन्धी ठगीलाई राष्ट्रिय समस्याका रूपमा लिएर सत्तापक्ष र प्रतिपक्ष सबै मिलेर समाधान खोज्नुपर्ने बताए।
उनका अनुसार रोजगारीका लागि विदेश जाने युवाको संख्या ठूलो रहे पनि भिसा र रोजगारी दिलाउने भन्दै सामाजिक सञ्जाल तथा अन्य माध्यमबाट संगठित रूपमा ठगी भइरहेको छ। उनले प्रत्येक वर्ष करिब ७ लाख युवा विदेश जाने र तीमध्ये ठूलो संख्यामा ठगीमा पर्ने गरेको दाबी गरे।
शाहीले ठगीमा संलग्नलाई प्रभावकारी रूपमा कारबाही गर्न विद्यमान कानुन पर्याप्त नभए तत्काल संशोधन गर्नुपर्नेमा जोड दिए। वैदेशिक रोजगारीका नाममा हुने ठगी नियन्त्रण गर्न राज्यले थप प्रभावकारी कदम चाल्नुपर्ने उनको भनाइ छ।
