काठमाडौं । जीतपुरसिमरा उपमहानगरपालिका–१ मा तीन वर्षीया बालिकाको बलात्कारपछि हत्या भएको घटनालाई लिएर स्थानीय प्रशासन, जनप्रतिनिधि, सुरक्षा निकाय र पीडित पक्षका प्रतिनिधिबीच पाँचबुँदे सहमति भएको छ। बिहीबार राति सशस्त्र प्रहरी बल नेपाल प्राविधिक तालिम शिक्षालय, पथलैयामा भएको छलफलमा राहत, अनुसन्धान, सुरक्षा व्यवस्थापन तथा प्रहरी अधिकृतको सरुवासहितका विषयमा सहमति जुटाइएको हो।
सहमतिअनुसार पीडित परिवारलाई राहत तथा रोजगारीका लागि गृह मन्त्रालयसमक्ष सिफारिस गर्ने, अनुसन्धानका क्रममा थप दोषी भेटिए कानुनअनुसार कारबाही गर्ने र जिल्लाको सुरक्षा अवस्थाको पुनरावलोकन गरी सुरक्षा व्यवस्था सुदृढ बनाउने निर्णय भएको छ। जिम्मेवार प्रहरी अधिकृतको सरुवासम्बन्धी विषयमा समेत सहमति भएको जनाइएको छ।
तर, पीडित बालिकाका अभिभावकले भने उक्त सहमति आफूहरूलाई जानकारी नदिई गरिएको भन्दै अस्वीकार गरेका छन्। उनीहरूले दोषीलाई आफूहरूको जिम्मा लगाउनुपर्ने तथा प्रधानमन्त्री, गृहमन्त्री र कानुनमन्त्रीको उपस्थितिमा कारबाहीको सुनिश्चितता हुनुपर्ने माग राखेका छन्।
पीडित परिवारको प्रदर्शन जारी रहेकाले मंगलबार बिहानदेखि अवरुद्ध पथलैया–वीरगन्ज सडकखण्ड अझै सञ्चालनमा आउन सकेको छैन। सडक अवरुद्ध हुँदा सयौँ मालवाहक तथा यात्रुवाहक सवारीसाधन बाटोमै रोकिएका छन्।
