काठमाडौं । अष्ट्रेलियामा जारी टप एण्ड टी–२० सिरिजअन्तर्गत नेपाल ‘ए’ले आज अष्ट्रेलियन क्यापिटल टेरिटोरीसँग प्रतिस्पर्धा गर्दैछ। डार्विनस्थित मर्रारा क्रिकेट मैदानमा हुने खेल नेपाली समयअनुसार दिउँसो ३ः१५ बजे सुरु हुनेछ।
नेपाल आज प्रतियोगितामा लगातार दोस्रो जित निकाल्ने लक्ष्यसहित मैदान उत्रनेछ। प्रतियोगिताको पहिलो खेलमा नर्दन टेरिटोरी स्ट्राइकसँग ८ विकेटले र दोस्रो खेलमा बंगालदेश हाइप्रफरमेन्स–११ सँग ९ विकेटले पराजित भएको नेपालले तेस्रो खेलमा होबर्ट हुरिकेन्स एकेडेमीलाई ३९ रनले पराजित गरेको थियो।
अष्ट्रेलियन क्यापिटल टेरिटोरीले प्रतियोगितामा खेलेका तीनवटै खेलमा पराजय बेहोरेको छ। त्यसैले नेपाल ‘ए’लाई पराजित गर्दै प्रतियोगितामा पहिलो जित निकाल्ने लक्ष्यका साथ टोली मैदान उत्रनेछ।
नेपाल तीन खेलबाट दुई अंक जोड्दै अंक तालिकाको सातौँ स्थानमा रहेको छ। अष्ट्रेलियन क्यापिटल टेरिटोरी भने तीनवटै खेलमा पराजित हुँदै अंकविहीन अवस्थामा नवौँ स्थानमा रहेको छ।
