काठमाडौं । भोटेकोशी बाढी प्रभावित क्षेत्र तथा आसपासका जिल्लामा आज अपराह्नपछि मध्यम वर्षा हुने सम्भावना रहेको जल तथा मौसम विज्ञान विभागले जनाएको छ। विभागका मौसमविद् रोजन लामिछानेका अनुसार भोटेकोशी बाढी प्रभावित रसुवा, नुवाकोट, धादिङलगायत आसपासका क्षेत्रमा अपराह्नपछि मध्यमसम्म वर्षा हुन सक्ने भएकाले प्रभावित क्षेत्रमा थप सतर्कता अपनाउनुपर्ने देखिएको छ।
विभागका अनुसार पछिल्लो १२ घण्टामा सबैभन्दा धेरै वर्षा सिन्धुपाल्चोकको नोस्यामपाटीस्थित मौसम मापन केन्द्रमा ६०.२ मिलिमिटर मापन भएको छ। यस अवधिमा बागमती, गण्डकी र लुम्बिनी प्रदेशका धेरै स्थानमा मध्यम वर्षा भएको छ भने कोशी, कर्णाली र सुदूरपश्चिम प्रदेशका केही स्थानमा हल्कादेखि मध्यम वर्षा भएको छ।
आज दिउँसो देशभर सामान्यतया बदली रहनेछ। हिमाली भूभागका केही तथा पहाडी भूभागका धेरै स्थानमा मेघगर्जन र चट्याङसहित मध्यमसम्म वर्षा तथा हिमपातको सम्भावना रहेको छ। तराईका विभिन्न भूभागमा पनि स्थानीय रूपमा मेघगर्जन र चट्याङसहित वर्षा हुन सक्ने विभागले जनाएको छ।
कोशी प्रदेश
कोशी प्रदेशमा आज मौसम सामान्यतया बदली रहनेछ। हिमाली भूभागका केही स्थानमा मेघगर्जन र चट्याङसहित मध्यमसम्म वर्षा तथा हिमपातको सम्भावना छ। तराईका थोरै स्थानमा समेत मेघगर्जन र चट्याङसहित मध्यमसम्म वर्षा हुनसक्ने विभागले जनाएको छ। राति पनि कोशी प्रदेशका हिमाली भूभागका एक–दुई स्थानमा भारी वर्षाको सम्भावना रहेको छ।
मधेस प्रदेश
मधेस प्रदेशमा दिउँसो मौसम सामान्यतया बदली रहनेछ। प्रदेशका तराई भूभागका थोरै स्थानमा मेघगर्जन र चट्याङसहित मध्यमसम्म वर्षा हुनसक्ने सम्भावना रहेको छ। वर्षाका कारण सडक आवागमन तथा दैनिक जनजीवनमा सामान्य प्रभाव पर्न सक्ने भएकाले आवश्यक सतर्कता अपनाउन विभागले आग्रह गरेको छ।
बागमती प्रदेश
बागमती प्रदेशका अधिकांश पहाडी तथा हिमाली भूभागमा आज मध्यमसम्म वर्षाको सम्भावना रहेको छ। मेघगर्जन र चट्याङसहित वर्षा तथा हिमपात हुनसक्ने विभागले जनाएको छ। विशेषगरी भोटेकोशी बाढी प्रभावित रसुवा, नुवाकोट, धादिङ तथा आसपासका क्षेत्रमा अपराह्नपछि मध्यम वर्षा हुनसक्ने भएकाले खोज तथा उद्धार तथा राहत व्यवस्थापनमा थप चुनौती आउन सक्ने देखिएको छ।
बागमती प्रदेशका हिमाली तथा पहाडी भूभागका एक–दुई स्थानमा भारी वर्षाको समेत सम्भावना रहेको छ। राति पनि प्रदेशका हिमाली भूभागमा भारी वर्षा हुन सक्ने भएकाले सतर्कता आवश्यक छ।
गण्डकी प्रदेश
गण्डकी प्रदेशका धेरै स्थानमा मध्यम वर्षाको सम्भावना रहेको छ। हिमाली तथा पहाडी भूभागमा मेघगर्जन र चट्याङसहित मध्यमसम्म वर्षा तथा हिमपात हुनसक्नेछ। प्रदेशका हिमाली तथा पहाडी भूभागका एक–दुई स्थानमा भारी वर्षाको समेत सम्भावना रहेको विभागले जनाएको छ। राति पनि हिमाली क्षेत्रमा भारी वर्षा हुन सक्ने भएकाले सतर्कता आवश्यक छ।
लुम्बिनी प्रदेश
लुम्बिनी प्रदेशका धेरै स्थानमा पछिल्लो समय मध्यम वर्षा भएको छ। आज पनि मौसम सामान्यतया बदली रहनेछ। पहाडी तथा तराई भूभागका केही स्थानमा मेघगर्जन र चट्याङसहित मध्यमसम्म वर्षा हुनसक्ने सम्भावना छ। प्रदेशका पहाडी तथा तराई भूभागका एक–दुई स्थानमा भारी वर्षाको सम्भावना रहेकाले जोखिमयुक्त क्षेत्रमा सावधानी अपनाउनुपर्ने देखिएको छ।
कर्णाली प्रदेश
कर्णाली प्रदेशका केही स्थानमा हल्कादेखि मध्यम वर्षा भएको छ। आज प्रदेशका पहाडी तथा तराई भूभागका केही स्थानमा मेघगर्जन र चट्याङसहित वर्षा हुनसक्नेछ। एक–दुई स्थानमा भारी वर्षाको समेत सम्भावना रहेकाले नदी तथा खोलानाला आसपासका क्षेत्रमा विशेष सावधानी अपनाउनुपर्ने विभागले जनाएको छ।
सुदूरपश्चिम प्रदेश
सुदूरपश्चिम प्रदेशका केही स्थानमा हल्कादेखि मध्यम वर्षा भएको छ। आज प्रदेशका पहाडी तथा तराई भूभागमा मेघगर्जन र चट्याङसहित मध्यमसम्म वर्षाको सम्भावना रहेको छ। केही स्थानमा भारी वर्षा हुन सक्ने भएकाले बाढी, पहिरो तथा डुबानको जोखिम भएका क्षेत्रमा सतर्कता अपनाउन आवश्यक रहेको विभागले जनाएको छ।
रातिको मौसम
आज राति पनि देशभर सामान्यतया बदली रहनेछ। हिमाली तथा पहाडी भूभागका केही स्थानमा मेघगर्जन र चट्याङसहित मध्यमसम्म वर्षा तथा हिमपात हुनसक्नेछ। तराईका थोरै स्थानमा समेत मेघगर्जन र चट्याङसहित मध्यमसम्म वर्षाको सम्भावना रहेको छ। राति कोशी, बागमती र गण्डकी प्रदेशका हिमाली भूभागका एक–दुई स्थानमा भारी वर्षा हुनसक्ने विभागले जनाएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख डा. धर्मराज उप्रेतीले वर्षाका कारण टनेलमा पानी भरिँदा भोटेकोशी बाढी प्रभावित क्षेत्रमा खोज तथा उद्धार कार्यमा थप चुनौती उत्पन्न भएको बताएका छन्।
उनका अनुसार रातभर परेको वर्षाका कारण टनेलभित्र पानी भरिएपछि पानी तान्ने पम्पसमेत डुबेको थियो। सुरक्षाकर्मीले पम्प निकालेर पानी तान्ने काम गरिरहेका छन्।
“बिहानैदेखि खोजी सुरु गरिएको छ । रातभरको वर्षाले पानी तान्ने पम्प छोपिएपछि सुरक्षाकर्मीले त्यसलाई निकाल्ने काम गरिरहेका छन्,” उनले भने।
जल तथा मौसम विज्ञान विभागले अझै तीन दिनसम्म वर्षा हुने सम्भावना रहेकाले भोटेकोशी बाढी प्रभावित क्षेत्रसहित जोखिमयुक्त स्थानमा थप समस्या आउन सक्ने जनाएको छ। वर्षाका कारण खोज, उद्धार, राहत तथा अन्य व्यवस्थापनका काममा चुनौती बढ्न सक्ने भएकाले सम्बन्धित निकायले आवश्यक सतर्कता अपनाइरहेको प्राधिकरणले जनाएको छ।
