काठमाडौं। आज देशभरको मौसम सामान्यतया बदली रहनेछ । जल तथा मौसम विज्ञान विभागका अनुसार हिमाली तथा पहाडी भू–भागका केही स्थानमा मेघगर्जन र चट्याङसहित मध्यमसम्म वर्षा तथा हिमपातको सम्भावना रहेको छ ।
हाल देशभर मनसुनी वायुको प्रभाव रहेको छ । मनसुनको न्यूनचापीय रेखा पश्चिममा सरदर स्थानभन्दा केही उत्तर तथा पूर्वमा सरदर स्थान आसपास रहेकाले आगामी तीन दिनसम्म मौसममा उल्लेख्य सुधार हुने सम्भावना नरहेको विभागले जनाएको छ ।
भोटेकोशी बाढीबाट प्रभावित रसुवा, नुवाकोट र धादिङमा आज मध्यमसम्म वर्षा हुने सम्भावना रहेको मौसमविद् सञ्जीव अधिकारीले जानकारी दिए । ती क्षेत्रमा भारी वर्षाको सम्भावना भने न्यून रहे पनि रातिको समयमा एक–दुई स्थानमा भारी वर्षा हुन सक्ने उनले बताए ।
विभागका अनुसार मनसुन पश्चिमतर्फ तुलनात्मक रूपमा बढी सक्रिय रहेकाले विशेषगरी बाढी तथा पहिरो प्रभावित क्षेत्रमा थप वर्षा हुँदा जोखिम बढ्न सक्ने सम्भावना छ । त्यसैले नदी तथा खोलानालाको आसपास र पहिरोको जोखिम भएका क्षेत्रमा बसोबास गर्नेहरूलाई सतर्क रहन आग्रह गरिएको छ ।
कोशी प्रदेश: हिमाली तथा पहाडी भू–भागका केही स्थानमा मेघगर्जन र चट्याङसहित मध्यमसम्म वर्षा हुने सम्भावना छ । एक–दुई स्थानमा भारी वर्षा हुन सक्ने तथा रातिको समयमा पनि एक–दुई स्थानमा भारी वर्षाको सम्भावना रहेको छ ।
मधेस प्रदेश: प्रदेशका अधिकांश स्थानमा सामान्यतया बदली रहनेछ भने केही स्थानमा हल्कादेखि मध्यम वर्षा हुन सक्ने सम्भावना छ ।
बागमती प्रदेश: हिमाली तथा पहाडी भू–भागका केही स्थानमा मध्यमसम्म वर्षा हुने सम्भावना छ । एक–दुई स्थानमा भारी वर्षा हुन सक्ने देखिएको छ । रसुवा, नुवाकोट र धादिङमा आज मध्यमसम्म वर्षाको सम्भावना रहे पनि भारी वर्षाको सम्भावना न्यून रहेको विभागले जनाएको छ ।
गण्डकी प्रदेश: हिमाली तथा पहाडी भू–भागका केही स्थानमा मेघगर्जन र चट्याङसहित मध्यम वर्षा हुन सक्नेछ । एक–दुई स्थानमा भारी वर्षाको सम्भावना रहेको छ ।
लुम्बिनी प्रदेश: पहाडी भू–भागका एक–दुई स्थानमा भारी वर्षा हुन सक्ने सम्भावना छ । अन्य क्षेत्रमा सामान्य बदली रहने तथा केही स्थानमा वर्षा हुन सक्ने विभागले जनाएको छ ।
कर्णाली प्रदेश: पहाडी भू–भागका एक–दुई स्थानमा भारी वर्षाको सम्भावना रहेको छ । हिमाली तथा पहाडी क्षेत्रमा बदलीसहित वर्षा हुन सक्नेछ ।
सुदूरपश्चिम प्रदेश: पहाडी भू–भागका एक–दुई स्थानमा भारी वर्षाको सम्भावना छ । प्रदेशका अन्य क्षेत्रमा पनि सामान्य बदली रहने र केही स्थानमा वर्षा हुन सक्ने विभागले जनाएको छ ।
आज राति कोशी, बागमती र गण्डकी प्रदेशका हिमाली तथा पहाडी भू–भागका एक–दुई स्थानमा भारी वर्षा हुन सक्ने विभागले जनाएको छ । वर्षाका कारण नदी तथा खोलानालामा जलसतह बढ्न सक्ने भएकाले प्रभावित क्षेत्रका बासिन्दालाई सतर्क रहन विभागले आग्रह गरेको छ ।
बाढी तथा पहिरोबाट प्रभावित क्षेत्रमा पुनः वर्षा हुँदा थप जोखिम निम्तिन सक्ने भएकाले नदी किनार, पहिरोको जोखिम भएका स्थान तथा कमजोर सडकमा यात्रा गर्दा विशेष सावधानी अपनाउनसमेत आग्रह गरिएको छ ।
