काठमाडौं । सोलुखुम्बुको महाकुलुङ गाउँपालिकास्थित हुङ्गा खोलामा पहिरो खसेर अस्थायी ड्याम बनेपछि नदी तटीय क्षेत्रमा सतर्कता अपनाउन आग्रह गरिएको छ। बिहान बनेको ड्यामको ताल भरिएपछि करिब ९:१० बजेदेखि पानी बग्न थालेको प्रहरीले जनाएको छ।
महाकुलुङ गाउँपालिका–२ र ४ को सीमाक्षेत्रमा पर्ने हुङ्गा खोलामा बिहान करिब ७ बजे गौरीशंकर हाइड्रोपावरको हेड अफिसबाट करिब १०० मिटर तल वडा नं. २ तर्फ ठूलो पहिरो खसेको थियो। पहिरोले खोलामा करिब १०० मिटर लामो र १५ मिटर अग्लो अवरोध बनेको थियो।
घटनाको जानकारी प्राप्त भएपछि इलाका प्रहरी कार्यालय सोताङ र प्रहरी चौकीबाट प्रहरी टोली घटनास्थलतर्फ परिचालन गरिएको छ। प्रहरीले घटनास्थलको अवस्था निगरानी गर्नुका साथै सम्भावित जोखिमबारे जानकारी संकलन गरिरहेको छ।
नदीको बहावबाट प्रभावित हुन सक्ने बस्ती तथा जलविद्युत् आयोजनालाई समेत सतर्क गराइएको छ। गौरीशंकर हाइड्रोपावरको पावर हाउस, दूधकोशी–२ हाइड्रोपावर नेपाल तथा सहास ऊर्जा लिमिटेडअन्तर्गतका दुई जलविद्युत् आयोजनालाई घटनाबारे जानकारी गराउँदै त्यहाँ कार्यरत कामदार र सवारीसाधनलाई सुरक्षित स्थानमा सार्न भनिएको छ।
हुङ्गा खोलाको पानी महाकुलुङ–२ बोदेलमा थुनिएको क्षेत्रबाट सोताङ, थुलुङ दूधकोशी र नेचासल्यान गाउँपालिका हुँदै दूधकोशी नदीमा मिसिन्छ। त्यसपछि पानी खोटाङ हुँदै ओखलढुंगातर्फ बग्ने गर्दछ।
ड्याम बनेपछि पानीको निकास सुरु भइसके पनि खोलाको बहाव र पहिरोले निम्त्याउन सक्ने जोखिमबारे प्रहरीले थप निरीक्षण गरिरहेको जनाएको छ। स्थानीयलाई नदी किनार तथा जोखिमयुक्त क्षेत्रमा नजान र सतर्क रहन आग्रह गरिएको छ।
