काठमाडौं । लगातारको वर्षापछि आएको बाढी र पहिरोका कारण बीपी राजमार्ग पूर्ण रूपमा अवरुद्ध भएको छ। राजमार्ग बन्द भएपछि पूर्वतर्फ जाने सबै सवारीसाधनलाई धुलिखेल चोकमै रोकिएको छ।
जिल्ला प्रहरी कार्यालय काभ्रेपलाञ्चोकका अनुसार काठमाडौं हुँदै धुलिखेलबाट पूर्वतर्फ जाने सवारीसाधनलाई धुलिखेलमै होल्ड गरिएको हो। जिल्ला प्रहरी प्रमुख एसपी रविन कार्कीले राजमार्गको विभिन्न स्थानमा पहिरो खसेपछि यातायात सञ्चालन प्रभावित भएको जानकारी दिएका छन्।
प्रहरीका अनुसार नमोबुद्ध नगरपालिका–६ को चौकीडाँडा, रोशी गाउँपालिका–७ को चारसयवेशी, वडा नम्बर ८ को गिम्दीवेशी र वडा नम्बर ११ को माम्तीमा पहिरो खसेको छ। पहिरोका कारण ती स्थानमा सडक पूर्ण रूपमा अवरुद्ध भएको प्रहरीले जनाएको छ।
यसैगरी चौकीडाँडा क्षेत्रमा रोशी खोलाले सडकको डाइभर्सनसमेत कटान गरेको छ। निरन्तर वर्षा भइरहेकाले पहिरो पन्छाएर सडक खुलाउन थप समय लाग्न सक्ने प्रहरीको भनाइ छ।
सडकको अवस्था प्रतिकूल रहेकाले प्रहरीले यात्रु तथा सवारी चालकलाई यात्रा गर्नुअघि राजमार्गको पछिल्लो अवस्थाबारे जानकारी लिन आग्रह गरेको छ। साथै, सडक खुल्ने अवस्था सुनिश्चित नभएसम्म वैकल्पिक व्यवस्था अपनाउनसमेत यात्रुहरूलाई सुझाव दिइएको छ।
