काठमाडौं । नेपाली कांग्रेसका प्रवक्ता देवराज चालिसेले पार्टीको १५औँ महाधिवेशनको तयारी अन्तिम चरणमा पुगेको बताएका छन्।
बिहीबार रिपोर्टर्स क्लब नेपालमा आयोजित साक्षात्कारमा चालिसेले महाधिवेशनमा सहभागी हुन विभिन्न देशबाट अतिथि आउने क्रम सुरु भएको जानकारी दिए।
उनका अनुसार पार्टीले सकेसम्म सबैलाई समेटेर महाधिवेशन अघि बढाउने प्रयास गरिरहेको छ। अधिकांश नेता महाधिवेशनमा सहभागी हुने र व्यक्तिगत आकांक्षा भएका केही नेता भने बाहिर रहन सक्ने उनले बताए।
नयाँ ऊर्जाका साथ महाधिवेशन आयोजना गर्न लागिएको बताउँदै चालिसेले पूर्वसभापति शेरबहादुर देउवालाई महाधिवेशन उद्घाटनका लागि निमन्त्रणा गरिसकिएको जानकारी दिए।
उनले आगामी महाधिवेशनबाट गगन थापा सर्वसम्मत रूपमा पार्टी सभापति बन्न सक्ने सम्भावना रहेको पनि बताए।
