काठमाडौं । लगातारको वर्षासँगै आएको बाढीपहिरोका कारण देशका विभिन्न क्षेत्रमा सडक यातायात प्रभावित भएको छ। केही प्रमुख सडकखण्ड पूर्ण रूपमा बन्द भएका छन् भने केही स्थानमा एकतर्फी यातायात सञ्चालन भइरहेको छ।
ललितपुरको बागमती गाउँपालिका–३ टाकुर्चेमा पहिरो खसेपछि काठमाडौँ उपत्यका जोड्ने कान्तिलोकपथ पूर्ण रूपमा अवरुद्ध भएको छ। यस्तै, रसुवामा बाढीका कारण मुख्य राजमार्गहरू अर्को सूचना जारी नभएसम्म बन्द गरिएको छ।
गण्डकी प्रदेशका विभिन्न सडकखण्डमा पनि बाढीपहिरोले आवागमन प्रभावित बनाएको छ। मनाङको बेँसीसहर–खाङ्सार सडक बाढीका कारण पूर्ण रूपमा बन्द छ। म्याग्दीको रघुगंगा गाउँपालिका–२ बैसरी र अन्नपूर्ण गाउँपालिका–३ सुकेबगरमा पहिरो गएपछि बेनी–जोमसोम सडकखण्डमा यातायात ठप्प भएको छ।
नवलपरासी पूर्वको कालीगण्डकी करिडोरअन्तर्गत बुलिङटार र बौदीकालीका विभिन्न स्थानमा पहिरो खसे पनि सडक एकतर्फी रूपमा सञ्चालनमा ल्याइएको छ। उक्त सडकमा ठूला सवारी साधन भने चल्न सकेका छैनन्।
कर्णाली प्रदेशको हुम्लामा पहिरोका कारण कर्णाली करिडोर तथा सिमकोट–हिल्सा सडकखण्डसमेत पूर्ण रूपमा अवरुद्ध भएका छन्। खार्पुनाथ, सर्केगार्ड, नाम्खा र सिमकोट गाउँपालिकाका विभिन्न स्थानमा पहिरो खसेपछि यातायात सेवा प्रभावित भएको हो।
