काठमाडौं । बाढीले पक्की पुल बगाएपछि अवरुद्ध रसुवा–नुवाकोट सडक सम्पर्क पुनःस्थापित गर्न बेत्रावतीस्थित फलाखुखोलामा बेलीब्रिज निर्माण भइरहेको छ। नेपाली सेनाको नेतृत्वमा भइरहेको पुल निर्माण दसैँअघि सम्पन्न गरी सवारी आवागमन सञ्चालन गर्ने तयारी गरिएको छ।
गत भदौ १० गते आएको बाढीले बेत्रावती क्षेत्रमा ठूलो क्षति पुर्याउनुका साथै फलाखुखोलाका पुराना र नयाँ दुवै पक्की पुल बगाएको थियो। पुल भत्किएपछि पासाङल्हामु मार्ग हुँदै काठमाडौँ–नुवाकोटबाट रसुवा जाने सडक यातायात प्रभावित भएको थियो।
नेपाली सेनाका प्रवक्ता सहायक रथी राजाराम बस्नेतका अनुसार बेलीब्रिज जडानका लागि आवश्यक सामग्री निर्माणस्थलमा पुर्याइसकिएको छ। गल्छी–मैलुङ–स्याफ्रुबेँसी सडक सुधार आयोजनाले आगलीटार–बेत्रावती सडकखण्ड सञ्चालनमा ल्याएपछि निर्माण सामग्री लैजान सहज भएको उनले बताए।
दसैँअघि पुल सञ्चालनमा आए बाढी प्रभावित नागरिकलाई आवतजावतमा सहज हुनुका साथै रसुवाको उत्तरी तथा दक्षिणी क्षेत्रबीचको सडक सम्पर्क पुनःस्थापित हुने अपेक्षा गरिएको छ। दैनिक उपभोग्य सामग्री ढुवानी र अत्यावश्यक सेवासमेत सहज हुने स्थानीयको अपेक्षा छ।
संविधानसभा सदस्य छोवाङ तेन्जिङ तामाङले दसैँअघि पुल सञ्चालन भए चाडपर्वका बेला सर्वसाधारणको आवागमन सहज हुने बताए। उनले बाढीपछिको राहत, उद्धार तथा यातायात पुनःसञ्चालनमा नेपाली सेनाले गरेको कामको प्रशंसा गरेका छन्।
