काठमाडौँ । नेकपा (एमाले) का उपमहासचिव योगेश भट्टराईले पार्टीभित्रको पुनर्गठन प्रक्रिया अघि बढ्ने भए पनि संगठनात्मक एकतामा कुनै विभाजन नहुने स्पष्ट पारेका छन्। उनले पार्टीभित्रको सुधार र पुनर्संरचना आवश्यक भए पनि सबै पक्षलाई समेटेर अघि बढिने बताएका हुन्।
पछिल्लो समय एमालेभित्र नेतृत्व शैली, संगठनात्मक संरचना र जिम्मेवारी बाँडफाँटलाई लिएर आन्तरिक बहस तीव्र बनेको छ। हालैका विभिन्न बैठक तथा प्रस्तावहरूमा नेतृत्व पुनर्संरचना, जिम्मेवारी हेरफेर र नयाँ कार्यविभाजनबारे छलफल भएको रिपोर्टहरू आएका छन्, जसलाई पार्टीभित्रको शक्ति सन्तुलनसँग जोडेर पनि हेरिएको छ।
यसै सन्दर्भमा भट्टराईले विगत केही महिनादेखि सार्वजनिक रूपमा पार्टीलाई आत्मसमीक्षा र रूपान्तरणतर्फ लैजानुपर्ने आवश्यकता औंल्याउँदै आएका छन्। निर्वाचनपछि आएको असन्तोषलाई स्वीकार गर्दै उनले संगठनात्मक सुधार, जवाफदेहिता र नयाँ ढाँचाको नेतृत्व आवश्यक रहेको टिप्पणी पनि गरेका थिए।
पछिल्ला सामाजिक सञ्जाल अभिव्यक्तिमा भट्टराईले पुनः दोहोर्याउँदै पार्टी फुट्ने वा टुट्ने अवस्था नरहेको र सबै पक्ष समेटेर अझ मजबुत रूपमा अघि बढ्ने बताएका छन्।
उनका अनुसार, “पुनर्गठन हुनेछ, तर पार्टी फुट्ने छैन, टुट्ने छैन। सबै मिल्ने छन्, थप एकताबद्ध हुने छन्।”
