काठमाडौँ । राष्ट्रिय स्वतन्त्र पार्टी (रास्वपा) कर्णाली प्रदेश समितिको नेतृत्व चयनका लागि निर्वाचन प्रक्रिया सुरु भएको छ।
आइतबार शुभ होटल, वीरेन्द्रनगर, सुर्खेत मा सुरु भएको प्रदेश अधिवेशनमा प्रतिनिधि छनोटसम्बन्धी विवादका कारण प्रारम्भिक दिनका अधिकांश कार्यहरू अवरुद्ध भएका थिए।
निर्वाचन समितिका अनुसार, मापदण्ड विपरीत चयन गरिएका प्रतिनिधिबारे उठेका प्रश्नपछि आवश्यक छलफल गरिएको र त्यसपछि सहमति जुटेसँगै निर्वाचन प्रक्रिया अघि बढाइएको हो।
समितिले तयार पारेको कार्यतालिका अनुसार सोमबार नै निर्वाचन सम्पन्न गर्ने लक्ष्य राखिएको छ। बिहान ११ बजे उम्मेदवारी दर्ताको समय तोकिएको भए पनि हालसम्म अन्तिम उम्मेदवार नामावली सार्वजनिक भइनसकेको निर्वाचन समितिले जनाएको छ।
सभापति पदका लागि चार जनाले आकांक्षा व्यक्त गरेको बताइएको छ।
