काठमाडौँ । रूपन्देहीको लुम्बिनीमा सोमबार प्रहरी महानिरीक्षक दान बहादुर कार्की को प्रमुख आतिथ्यतामा शान्ति पदयात्रा तथा जनचेतनामूलक कार्यक्रम सम्पन्न भएको छ।
लुम्बिनी सांस्कृतिक नगरपालिका–१० स्थित विश्व शान्ति दीपबाट सुरु भएको पदयात्रा अन्तर्राष्ट्रिय सभाहलमा पुगेर समापन गरिएको हो। उक्त कार्यक्रम लुम्बिनी प्रदेश प्रहरी कार्यालयको आयोजनामा सम्पन्न भएको हो।
कार्यक्रमलाई सम्बोधन गर्दै महानिरीक्षक कार्कीले शान्तिपूर्ण तथा सुरक्षित समाज निर्माणका लागि प्रहरीको एकल प्रयास मात्र पर्याप्त नहुने उल्लेख गर्दै सामूहिक सहकार्यको आवश्यकता औँल्याए। उनले सुरक्षा, शान्ति र विकासका चुनौतीहरू समाधान गर्न सुरक्षा निकाय, स्थानीय तह, नागरिक समाज तथा सबै सरोकारवालाबीच समन्वयात्मक रूपमा अघि बढ्नुपर्नेमा जोड दिए।
उनले लागूऔषध दुर्व्यसन, आत्महत्या तथा सडक दुर्घटना जस्ता गम्भीर सामाजिक समस्याहरू समाधान गर्न सामूहिक प्रतिबद्धता अपरिहार्य रहेको उल्लेख गर्दै पदयात्राले समन्वय र सहकार्यको उदाहरण प्रस्तुत गरेको बताए।
कार्यक्रमको उद्देश्य बुद्ध जन्मस्थल लुम्बिनीबाट शान्ति, सहिष्णुता र सामाजिक सद्भावको सन्देश राष्ट्रिय तथा अन्तर्राष्ट्रिय रूपमा प्रवाह गर्नु रहेको प्रहरीले जनाएको छ।
अन्तर्राष्ट्रिय सभाहलमा आयोजित समापन कार्यक्रममा नेपाल प्रहरी केन्द्रीय सङ्गीत विद्यालयबाट सङ्गीत टोलीद्वारा ब्यान्ड प्रदर्शन गरिएको थियो। सो अवसरमा एसिड आक्रमण, लागूऔषध दुर्व्यसन, सडक दुर्घटना, आत्महत्या तथा बालविवाहजस्ता सामाजिक समस्यासम्बन्धी जनचेतनामूलक नाटकहरू प्रस्तुत गरिएका थिए।
त्यसैगरी लागूऔषधको कुलतबाट मुक्त भई समाजमा पुनःस्थापित भएका व्यक्तिहरूले आफ्ना अनुभव सुनाउँदै युवा पुस्तालाई सचेत रहन आग्रह गरेका थिए।
लुम्बिनी प्रदेश प्रहरी कार्यालयले जेठ ३० गतेदेखि असार १ गतेसम्म सञ्चालन गरेको तीनदिने विशेष कार्यक्रमअन्तर्गत बुटवलमा प्रविधि सुरक्षासम्बन्धी ह्याकाथन कार्यक्रम सम्पन्न भइसकेको छ भने लुम्बिनीमा शान्ति पदयात्रा सम्पन्न भएको हो।
अब बुटवलस्थित अन्तर्राष्ट्रिय सम्मेलन केन्द्रमा साइबर अपराध तथा डिजिटल सुरक्षासम्बन्धी बृहत् जनचेतनामूलक कार्यक्रम आयोजना हुने जानकारी दिइएको छ।
