काठमाडौं, असार ७ — नेपाली कांग्रेसका सभापति गगन थापाले राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनको अवसरमा शुभकामना व्यक्त गरेका छन्।
आइतबार जारी शुभकामना सन्देशमा थापाले रास्वपाले स्थापना भएको छोटो अवधिमै उल्लेखनीय जनसमर्थन हासिल गर्दै राष्ट्रिय राजनीतिमा आफ्नो प्रभावशाली उपस्थिति स्थापित गर्न सफल भएको उल्लेख गरेका छन्। उनले सभापति रवि लामिछानेको नेतृत्वमा संगठन निर्माणदेखि निर्वाचनसम्म पार्टीले तय गरेको यात्रा प्रशंसनीय रहेको बताएका छन्।
थापाले प्रथम महाधिवेशनलाई रास्वपाका लागि विचार, नीति र संगठनात्मक दृष्टिले थप परिपक्व बन्ने ऐतिहासिक अवसरका रूपमा चित्रण गरेका छन्। उनका अनुसार महाधिवेशनले पार्टीलाई जिम्मेवार, जवाफदेही र दूरदर्शी राजनीतिक शक्तिका रूपमा विकास गर्न महत्वपूर्ण भूमिका खेल्नेछ।
शुभकामना सन्देशमा उनले लोकतान्त्रिक मूल्य, संविधानले सुनिश्चित गरेका नागरिक अधिकार तथा लोकतान्त्रिक अभ्यासप्रति प्रतिबद्धतालाई अझ सुदृढ बनाउन महाधिवेशनले नयाँ ऊर्जा प्रदान गर्ने विश्वास व्यक्त गरेका छन्।
साथै, थापाले रास्वपाको प्रथम महाधिवेशन सफलतापूर्वक सम्पन्न होस् भन्दै पार्टीको आगामी राजनीतिक यात्राका लागि समेत शुभकामना व्यक्त गरेका छन्।
