काठमाडौं। सम्पत्ति शुद्धीकरण अनुसन्धान विभागले पूर्वप्रधानमन्त्री शेरबहादुर देउवाका छोरा जयवीर देउवालाई अनुसन्धानका लागि सात दिनभित्र कार्यालयमा उपस्थित हुन निर्देशन दिएको छ।
विभागका अधिकारीहरूले सोमबार बुढानीलकण्ठस्थित जयवीर देउवाको निवास बाहिर सूचना टाँस गर्दै सम्पत्ति शुद्धीकरणसम्बन्धी अनुसन्धानका क्रममा आवश्यक जानकारी लिनुपर्ने भएकाले हरिहरभवनस्थित विभागको कार्यालयमा उपस्थित हुन भनेका हुन्।
सूचनामा तोकिएको अवधिभित्र उपस्थित नभए कानुनबमोजिम प्रक्रिया अघि बढाइने उल्लेख छ। विभागले यसअघि पूर्वप्रधानमन्त्री देउवा र उनकी पत्नी, पूर्वपरराष्ट्रमन्त्री आरजु राणा देउवामाथि पनि सम्पत्ति शुद्धीकरणसम्बन्धी अनुसन्धान गरिरहेको जनाएको छ।
उनीहरू पछिल्लो केही समयदेखि हङकङमा रहेको बताइएको छ।
