काठमाडौं । पहिरो खसेपछि कालीगण्डकी करिडोरको बागलुङ खण्ड अवरुद्ध भएको छ। जैमिनी नगरपालिका–८ बेलबगर क्षेत्रमा गए रातिदेखि खसेको पहिरोका कारण सडकमा आवतजावत रोकिएको हो।
सडक अवरुद्ध भएपछि बागलुङको दक्षिण क्षेत्रको यातायात सम्पर्क प्रभावित भएको छ। बुटवलतर्फ जाने र आउने सवारीसाधन बेलबगर क्षेत्रमा रोकिएका छन्।
जिल्ला प्रहरी कार्यालय बागलुङका सूचना अधिकारी तथा प्रहरी नायब उपरीक्षक रामेश्वर त्वातीका अनुसार सडक खुलाउन कालीगण्डकी करिडोर आयोजनासँग समन्वय भइरहेको छ।
लगातार वर्षाका कारण पहाडी क्षेत्रमा पहिरोको जोखिम बढिरहेका बेला सडक अवरुद्ध भएपछि यात्रु तथा स्थानीयवासी प्रभावित भएका छन्। पहिरो हटाएर यातायात सञ्चालनमा ल्याउने प्रयास भइरहेको प्रहरीले जनाएको छ।
